កាលពីថ្ងៃអង្គារម្សិលមិញ បេសកជនអង្គការសហប្រជាជាតិរបស់កូរ៉េខាងជើងបានចោទប្រកាន់ថា សមយុទ្ធយោធារួមគ្នារវាងសហរដ្ឋអាមេរិក និងកូរ៉េខាងត្បូង កំពុងរុញច្រានឲ្យឧបទ្វីបកូរ៉េខិតចូលក្នុងសង្គ្រាមនុយក្លេអ៊ែរ ខណៈប្រទេសរបស់លោកគ្មានជម្រើសអ្វី ក្រៅតែពីពន្លឿនលើការបង្កើនសមត្ថភាពការពារជាតិរបស់ខ្លួនបន្ថែមទៀត។ នេះបើតាមការចុះផ្សាយពីសារព័ត៌មាន Reuters ។
លោកឯកអគ្គរដ្ឋទូត Kim Son បានថ្លែងនៅក្នុងកិច្ចប្រជុំប្រចាំឆ្នាំនៃមេដឹកនាំពិភពលោករបស់អង្គការសហប្រជាជាតិថា៖ ឆ្នាំ ២០២៣នេះ អាចចាត់ទុកបានថាជាឆ្នាំដ៏គ្រោះថ្នាក់បំផុត ហើយឧបទ្វីបកូរ៉េកំពុងស្ថិតក្នុងស្ថានភាពដែលអាចបង្កឱ្យមានគ្រោះថ្នាក់នៃការផ្ទុះសង្គ្រាមនុយក្លេអ៊ែរ។
ឯកអគ្គរដ្ឋទូតរូបនេះដដែរ បានប្រាប់ទៅកាន់មហាសន្និបាតដែលមានសមាជិកទាំង ១៩៣ប្រទេសនោះថា ដោយសារកាលៈទេសៈកំពុងតែកើតមាន ទីក្រុងព្យុងយ៉ាងត្រូវការបង្កើនសមត្ថភាពលើវិស័យការពាររបស់ខ្លួនជាបន្ទាន់ ដើម្បីការពារខ្លួនក្នុងករណីដែលអាចទប់ទល់បាន។
មិនត្រឹមតែប៉ុណ្ណោះ ទីក្រុងព្យុងយ៉ាងនិយាយថា ខ្លួនកំពុងអនុវត្តសិទ្ធិការពារខ្លួន ក្រោមសកម្មភាពសាកល្បងកាំជ្រួចផ្លោង ក្នងន័យដើម្បីការពារដែនអធិបតេយ្យភាព និងផលប្រយោជន៍សន្តិសុខពីការគំរាមកំហែងផ្នែកយោធា។
ក្នុងនោះប្រទេសចិន និងរុស្ស៊ី បាននិយាយថា សមយុទ្ធយោធារួមគ្នា រវាងសហរដ្ឋអាមេរិក និងកូរ៉េខាងត្បូង ជាសកម្មភាពញុះញង់ទីក្រុងព្យុងយ៉ាង ខណៈទីក្រុងវ៉ាស៊ីនតោន បានចោទប្រកាន់ទីក្រុងប៉េកាំង និងមូស្គូ ពីការគាំទ្រកូរ៉េខាងជើង ដោយលាក់បាំងប្រទេសនេះពីទណ្ឌកម្មបន្ថែមទៀត។
សូមជម្រាបថា កូរ៉េខាងជើងបានសាកល្បងកាំជ្រួចផ្លោងរាប់សិបគ្រាប់មកហើយ ក្នុងរយៈពេល១៨ខែកន្លងមកនេះ ដោយឡែកសហរដ្ឋអាមេរិកឯណោះវិញ បានព្រមានជាយូរមកហើយថា ទីក្រុងព្យុងយ៉ាងបានត្រៀមខ្លួនរួចជាស្រេច ក្នុងការធ្វើតេស្តអនុវត្តអាវុធនុយក្លេអ៊ែរលើកទីប្រាំពីរ៕
