៩ខែដំបូង វៀតណាមទទួលបានចំណូលជាង ៣ពាន់លានដុល្លារ ពីការនាំចេញគ្រាប់កាហ្វេ

រយៈពេល ៩ខែដំបូងនៃឆ្នាំ២០២៣នេះ ប្រាក់ចំណូលពីការនាំចេញគ្រាប់កាហ្វេរបស់ប្រទេសវៀតណាម មានការកើនឡើងប្រហែល ១,៩% គិតជាទឹកប្រាក់ប្រហែល ៣,២ពាន់លានដុល្លារ។ នេះបើតាមការចុះផ្សាយពីសារព័ត៌មាន CNA។

ប្រភពដដែលបន្ថែមថា បើទោះជាប្រាក់ចំណូលបានមកពីការនាំចេញគ្រាប់កាហ្វេ មានការកើនឡើង ប៉ុន្តែចំនួននាំចេញបែរជាមានការធ្លាក់ចុះប្រហែល ៧,៣% ឬប្រហែល ១,២៧លានតោនទៅវិញ។

ជាមួយគ្នានោះ រដ្ឋាភិបាលវៀតណាមក៏បានបង្ហើបដែរថា ការនាំចេញគ្រាប់កាហ្វេសម្រាប់ខែកញ្ញា នឹងមានចំនួន ៦៥ ០០០តោន ដែលស្មើនឹងទឹកប្រាក់​ប្រមាណ ២០៥លានដុល្លារ។

ជម្រាបបន្ថែមថា វៀតណាមជាប្រទេសផលិត និងនាំចេញគ្រាប់កាហ្វេធំបំផុតលើលោកមួយ ខណៈកាលពីឆ្នាំទៅ វៀតណាមជាប្រទេសទទួលបានចំណូលខ្ពស់បំផុតទី៥ ពីការនាំចេញទំនិញមួយនេះ ពោលប្រមាណ ៣,២៣ពាន់លានដុល្លារ៕