កាលពីថ្ងៃទី២៨ ខែកញ្ញាម្សិលមិញ លោកស្រី Marjorie Taylor Greene សមាជិកសភាតំណាងរាស្ត្រ មកពីគណបក្សសាធារណរដ្ឋ បានស្នើឲ្យសភាអនុម័តលើសំណើសុំកាត់ប្រាក់ខែរដ្ឋមន្ត្រីការពារជាតិ Lloyd Autstin មកនៅត្រឹម ១ដុល្លារ។ នេះបើតាមការចុះផ្សាយពីសារព័ត៌មាន USAToday។
លោកស្រី Marjorie បានរិះគន់យ៉ាងខ្លាំងទៅលើរដ្ឋមន្ត្រីការពារជាតិស្បែកខ្មៅម្នាក់នេះ ដោយសង្កត់ធ្ងន់ថា លោកមិនបានបំពេញតួនាទីបានត្រឹមត្រូវ ហើយកំពុងធ្វើឲ្យខូចសណ្ដាប់ធ្នាប់កងយោធាអាមេរិក។
“រដ្ឋលេខាធិការ Austin មិនបានបំពេញការងាររបស់គាត់បានល្អឡើយ ហើយក៏កំពុងបំផ្លាញកងយោធារបស់អាមេរិកថែមទៀត។ ការដឹកនាំរបស់គាត់ហាក់មិនមានទំនុកចិត្តសោះ ហើយគាត់សមតែត្រូវបានដកចេញពីតំណែង”។ នេះបើតាមសម្ដីរបស់សមាជិកសភា Marjorie ប្រាប់ទៅកាន់បណ្ដាញសារព័ត៌មាន។
សូមជម្រាបដែរថា បច្ចុប្បន្នសមាជិកសភាទាំងអស់កំពុងប្រជុំគ្នា ធ្វើការបោះឆ្នោតចំពោះការអនុម័តវិសោធនកម្មពីលោកស្រី Marjorie Taylor Greene ដើម្បីកាត់បន្ថយប្រាក់ខែរបស់លោក Lloyd Austin មកត្រឹម ១ដុល្លារ ខណៈបើតាមប្រាក់ខែបច្ចុប្បន្ន រដ្ឋមន្ត្រីការពារជាតិស្បែកខ្មៅដំបូងរបស់អាមេរិក អាចទទួលបានចំណូលប្រហែល ២២១ ០០០ដុល្លារ ក្នុងមួយឆ្នាំ៕
