អគ្គនាយិកាក្រុមហ៊ុនអចលនទ្រព្យវៀតណាម Nhat Nam Group អ្នកស្រី Vu Thi Thuy ត្រូវបានគេរាយការណ៍មកថា បានឆបោកមនុស្សជាង ២ម៉ឺននាក់ ពីគម្រោងអចលនទ្រព្យខ្យល់ និងទទួលបានទឹកប្រាក់ប្រមាណ ៩ទ្រីលានដុង ឬប្រហែល ៣៧០,៣លានដុល្លារ។ នេះបើតាមការចុះផ្សាយពីសារព័ត៌មាន VNExpress។
ជាមួយគ្នានេះ លោក To An Xo អ្នកនាំពាក្យក្រសួងសន្តិសុខសាធារណៈ បាននិយាយកាលពីថ្ងៃសៅរ៍ថា ទឹកប្រាក់ដែលត្រូវបានគេឆបោកនោះ គឺបានតាមរយៈការចុះកុងត្រាពាណិជ្ជកម្មប្រមាណ ៤៥ ៥២៥កន្លែង ចន្លោះពីឆ្នាំ២០២០ ដល់២០២២ ខណៈអ្នកស្រី Thuy បានប្រើប្រាស់ទឹកប្រាក់ប្រហែល ២៦លានដុល្លារ ដើម្បីផលប្រយោជន៍ផ្ទាល់ខ្លួន។
អំឡុងពេលបើកការស៊ើបអង្កេតក្នុងករណីមួយនេះ វិនិយោគិនប្រមាណ ១១០នាក់បានចូលរួមសហការ និងបានប្រាប់អាជ្ញាធរវៀតណាមថា ពួកគេចាញ់បោកអគ្គនាយិកាក្រុមហ៊ុន Nham Nam Group ប្រហែល ៥,៦លានដុល្លារ។
សូមជម្រាបដែរថា គម្រោងអចលនទ្រព្យរបស់ក្រុមហ៊ុនវៀតណាម ដែលអះអាងថាមាននៅខេត្ត Hoa Binh និងខេត្ត Binh Thuan គឺសុទ្ធតែជាការបោកប្រាស់ ពោលមិនមានអចលនទ្រព្យរបស់ក្រុមហ៊ុនមួយនេះ នៅក្នុងខេត្តទាំងនោះ ដូចជាការផ្សព្វផ្សាយនាពេលកន្លងឡើយ។
គួររំលឹកបន្ថែមថា អ្នកស្រី Vu Thi Thuy ត្រូវបានប៉ូលិសឃាត់ខ្លួនកាលពីថ្ងៃទី០៨ ខែកញ្ញាកន្លងទៅ បន្ទាប់ពីមានការចោទប្រកាន់ថា អ្នកស្រីទទួលបានអចលនទ្រព្យ ដោយសារការឆបោក៕
