បើតាមប្រភពពីសារព័ត៌មាន The Japan Times បានចុះផ្សាយថា រដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និងឧស្សាហកម្ម លោក Yasutoshi Nishimura បាននិយាយនៅថ្ងៃអង្គារនេះថា ប្រទេសជប៉ុននឹងផ្តល់ប្រាក់ឧបត្ថម្ភបន្ថែមរហូតដល់ទៅ ១៩២ពាន់លានយ៉េន (១,៣ ពាន់លានដុល្លារ) ដល់រោងចក្រផលិតបន្ទះឈីបរបស់អាមេរិក Micron Technology នៅក្នុងខេត្ត Hiroshima ខណៈដែលប្រទេសនេះកំពុងព្យាយាមពង្រឹងខ្សែសង្វាក់ផ្គត់ផ្គង់បន្ទះឈីបរបស់ខ្លួន។
“វាមានសារៈសំខាន់ខ្លាំងណាស់ ចំពោះការវិនិយោគនៅក្នុងតំបន់ ដែលមើលឃើញអំពីសក្តានុពលនៃតម្រូវការកំពុងតែកើនឡើង”។ នេះបើតាមសម្តីរបស់លោក Nishimura បាននិយាយនៅក្នុងសន្និសីទសារព័ត៌មាន។
ជាមួយគ្នានោះ ក្រុមហ៊ុន Micron បាននិយាយថា ខ្លួនគ្រោងនឹងវិនិយោគរហូតដល់ ៥០០ ពាន់លានយ៉េននៅក្នុងប្រទេសជប៉ុន នារយៈពេលប៉ុន្មានឆ្នាំខាងមុខ ហើយនឹងក្លាយជាក្រុមហ៊ុនដំបូងគេដែលប្រើប្រាស់ម៉ាស៊ីន lithography Ultraviolet ដែលជាឧបករណ៍ទំនើបបំផុតសម្រាប់ការផលិតបន្ទះឈីប។
សូមជម្រាបថា មិនមែនមានតែក្រុមហ៊ុន Micron ប៉ុណ្ណោះទេ ដែលទទួលបានជំនួយដ៏សម្បើមពីរដ្ឋាភិបាលជប៉ុន ពោលគឺនៅមានក្រុមហ៊ុន Taiwan Semiconductor Manufacturing ផងដែរ ដែលទទួលបានកញ្ចប់ទឹកប្រាក់រហូតដល់ទៅ ៤៧៦ ពាន់លានយ៉េន សម្រាប់រោងចក្រដែលនឹងត្រូវសាងសង់ក្នុងខេត្ត Kumamoto ៕
