នាថ្ងៃទី០៥ ខែតុលានេះ ប្រទេសជប៉ុនបានចាប់ផ្ដើមបង្ហូរទឹកវិទ្យុសកម្មពីរោងចក្រនុយក្លេអ៊ែរ Fukushima ទៅក្នុងមហាសមុទ្រជាលើកទី២ ខណៈការបង្ហូរទឹកនេះចាប់ផ្ដើមកាលពីម៉ោង ១០ និង១៨នាទី ម៉ោងនៅជប៉ុន។ នេះបើតាមការចុះផ្សាយពីទីភ្នាក់ងារសារព័ត៌មាន AFP។
សម្រាប់ការបង្ហូរទឹកវិទ្យុសកម្មលើកទី២នេះ ជប៉ុនគ្រោងបង្ហូរទឹកប្រមាណ ៧ ៨០០តោន ខណៈការបង្ហូរលើកទីមួយ ដែលធ្វើកាលពីថ្ងៃទី២៤ ខែសីហា មានប្រមាណ ១,៣៤លានតោន។
គួររំលឹកដែរថា ជុំវិញការបង្ហូរទឹកវិទ្យុសកម្មរបស់ជប៉ុន គឺទទួលបានការរិះគន់យ៉ាងខ្លាំង ជាពិសេសប្រទេសចិន ដោយបានដាក់ចេញវិធានការហាមឃាត់ការនាំចូលគ្រឿងសមុទ្រពីជប៉ុន បន្ទាប់ពីបារម្មណ៍ថា សារធាតុវិទ្យុសកម្មដែលបានហូរចូលក្នុងទឹកនោះ ធ្វើឲ្យប៉ះពាល់ដល់សុខភាពប្រជាជន។
សូមជម្រាបបន្ថែមថា ដើម្បីសម្រេចផែនការបង្ហូរទឹកវិទ្យុសកម្មចេញឲ្យអស់ពីរោងចក្រ Fukushima ជប៉ុនត្រូវការពេលប្រហែលរាប់ទសវត្សឯណោះ ស្របពេលពួកគេក៏មានបំណងចង់រុះរើរោងចក្រមួយនេះផងដែរ៕
