នាយករដ្ឋមន្ត្រីម៉ាឡេស៊ី លោក Anwar Ibrahim បាននិយាយថា ប្រទេសអារ៉ាប់រួម នឹងចូលរួមបណ្តាក់ទុន ៨ពាន់លានដុល្លារ ជួយប្រទេសរបស់ខ្លួន ក្នុងការអភិវឌ្ឍសមត្ថភាពផលិតថាមពលកកើតឡើងវិញឱ្យបាន ១០ ជីហ្គាវ៉ាត់ នៅត្រឹមឆ្នាំ ២០២៥ ។ នេះបើតាមការចុះផ្សាយពីសារព័ត៌មាន Bloomberg ។
នៅក្នុងការបង្ហោះសារមួយនៅលើបណ្តាលសង្គមហ្វេសប៊ុក លោក Anwar បានបង្ហាញថា ផែនការនេះ គឺជាផ្នែកមួយនៃអនុស្សរណៈនៃការយោគយល់គ្នា ដែលបានចុះហត្ថលេខា ដោយអាជ្ញាធរអភិវឌ្ឍការវិនិយោគម៉ាឡេស៊ី (MIDA) និងក្រុមហ៊ុន Abu Dhabi Future Energy Co. ក្នុងអំឡុងដំណើរទស្សនកិច្ចរបស់លោក ទៅកាន់ទីក្រុង Abu Dhabi ប្រទេសអារ៉ាប់រួម កាលពីថ្ងៃព្រហស្បតិ៍។
គួរឱ្យដឹងថា ម៉ាឡេស៊ី មានបំណងទាញឱ្យបាន ៧០% នៃការផ្គត់ផ្គង់ថាមពលសរុបរបស់ខ្លួន ពីប្រភពកកើតឡើងវិញ នៅត្រឹមឆ្នាំ ២០៥០ បើធៀបទៅនឹងគោលដៅប្រហែល ២៥% ដែលបានលើកឡើងកាលពីចុងខែមីនា ខណ:រដ្ឋភិបាល បានប៉ាន់ប្រមាណថា ខ្លួននឹងត្រូវការវិនិយោគទឹកប្រាក់ដល់ទៅ ១៣៥ពាន់លានដុល្លារឯណោះ ដើម្បីបំពេញគោលដៅនេះ។
ទន្ទឹមនឹងនេះ លោក Anwar ក៏បាននិយាយផងដែរថា ម៉ាឡេស៊ី និងអារ៉ាប់រួម នឹងបន្តពង្រឹងទំនាក់ទំនងជាមួយគ្នាបន្ថែមទៀត តាមរយៈកិច្ចព្រមព្រៀងវិនិយោគ រវាង MIDA និងក្រុមប្រឹក្សាវិនិយោគអន្តរជាតិរបស់ប្រទេសអារ៉ាប់រួម នៅពេលដែលលោក បានជួបជាមួយប្រធានាធិបតីអារ៉ាប់រួម លោក Heikh Mohamed bin Zayed Al Nahyan ក្នុងអំឡុងដំណើរទស្សនកិច្ចទៅកាន់ប្រទេសនេះ ៕
