អនុរដ្ឋមន្ត្រីក្រសួងហិរញ្ញវត្ថុថៃ លោក Julapun Amornvivat បាននិយាយកាលពីថ្ងៃអង្គារម្សិលមិញថា រដ្ឋាភិបាល កំពុងពិចារណាកែសម្រួលផែនការផ្តល់លុយឌីជីថល ១០ ០០០បាត សម្រាប់ពលរដ្ឋម្នាក់ៗ របស់ខ្លួន ដោយនឹងមិនរាប់បញ្ចូលក្រុមអ្នកមាននោះឡើយ។ នេះបើតាមការចុះផ្សាយពីសែត Bangkok Post។
សំណើនេះត្រូវកើតឡើងចំពេលដែលរដ្ឋាភិបាលរបស់នាយករដ្ឋមន្រ្តីថ្មី លោក Srettha Thavisin បាននិងកំពុងការពារគោលនយោបាយស្តារសេដ្ឋកិច្ចរបស់ខ្លួន បន្ទាប់ពីមានក្រុមអ្នករិះគន់ បាននិយាយថា ការចំណាយលើផែនការផ្តល់លុយឌីជីថល ដែលមានចំនួនសរុបប្រមាណ ៥៦០ពាន់លានបាត ហាក់ជាចំនួនច្រើនលើសលប់ពេក។
ជុំវិញការលើកឡើងបែបនេះ លោក Julapun បាននិយាយថា គណៈកម្មាធិការគ្រប់គ្រងការផ្តល់ជូនលុយឌីជីថល នឹងធ្វើការពិចារណាឡើងវិញ ទៅលើការកែសម្រួលគ្រោងការណ៍នេះ ដើម្បីដកក្រុមអ្នកមានទ្រព្យសម្បត្តិចេញពីផែនការ ដូចដែលអ្នករិះគន់មួយចំនួនបានស្នើឡើង។
លោក Julapun បានបន្ថែមទៀតថា គម្រោងនេះនឹងនៅតែផ្តោតលើក្រុមពលរដ្ឋងាយរងគ្រោះ និងអ្នកមានប្រាក់ចំណូលទាប បើទោះជាពលរដ្ឋដែលមានជីវភាពធូរធារ មិនត្រូវបានគេរាប់បញ្ចូលក៏ដោយ។
ជម្រាបជូនផងដែរថា គណបក្សភឿថៃ បានស្នើឱ្យមានផែនការផ្តល់លុយឌីជីថល ១០ ០០០បាត ដល់ប្រជាជនថៃពេញវ័យទាំងអស់ ដែលមានអាយុលើសពី ១៦ ឆ្នាំ ខណ:ផែនការនេះ ត្រូវបានគេមើលឃើញថាជាមធ្យោបាយដ៏សំខាន់មួយ ដើម្បីបង្កើនសាច់ប្រាក់ចរាចរនៅក្នុងចរន្តសេដ្ឋកិច្ច និងថែមទាំងអាចផ្តល់កំណើនសេដ្ឋកិច្ច ៥% ផងដែរ ប្រសិនបើកម្មវិធីនេះដំណើរការដូចការរំពឹងទុកនោះ ៕
