កាលពីថ្ងៃទី១៥ ខែតុលា ប្រធានាធិបតីរុស្ស៊ី លោក វ៉្លាឌីមៀ ពូទីន បានពោលសរសើរពីគំនិតផ្ដួចផ្ដើមខ្សែក្រវ៉ាត់ និងផ្លូវ របស់ប្រទេសចិន ដោយអះអាងថា វាមានសារៈសំខាន់ និងបង្កើតឡើង ក្នុងគោលបំណងពង្រីកកិច្ចសហប្រតិបត្តិការទូទាំងសកលលោក។ នេះបើតាមការចុះផ្សាយពីសារព័ត៌មាន CNA។
“ពួកយើងទទួលបានដំណឹងថា មានក្រុមខ្លះចោទចិនថាបង្កើតគំនិតផ្ដួចផ្ដើមខ្សែក្រវ៉ាត់ និងផ្លូវ ដើម្បីគាបសង្កត់ប្រទេសតូចៗ ប៉ុន្តែពួកយើងមិនគិតបែបនោះឡើយ។ ពួកយើងយល់ឃើញថា វាបង្កើតឡើង ដើម្បីពង្រីកកិច្ចសហប្រតិបត្តិការជុំវិញសកលលោកប៉ុណ្ណោះ”។ នេះបើតាមការដកស្រង់សម្ដីរបស់លោកពូទីន ពីសារព័ត៌មានរុស្ស៊ី RIA។
បន្ថែមពីនោះ មេដឹកនាំរុស្ស៊ីក៏បានសង្កត់ធ្ងន់ទៀតថា៖ តាមគំនិតរបស់ខ្ញុំ អត្ថប្រយោជន៍ធំបំផុតនៃការបង្កើតវាឡើង គឺធ្វើការរួមគ្នាជាធ្លុងមួយ មិនមែនបង្កើតបញ្ហា ឬបង្កហានិភ័យទៅកាន់ប្រទេសណាឡើយ។
សូមជម្រាបដែរថា គំនិតផ្ដួចផ្ដើមខ្សែក្រវ៉ាត់ និងផ្លូវ គឺជាផែនការសម្រាប់ហេដ្ឋារចនាសម្ព័ន្ធសកល និងបណ្តាញថាមពល ដែលប្រទេសចិនបានចាប់ផ្តើមកាលពីមួយទសវត្សមុន ដើម្បីភ្ជាប់អាស៊ីជាមួយអាហ្វ្រិក និងអឺរ៉ុប តាមរយៈផ្លូវគោក និងផ្លូវសមុទ្រ។
រំលឹកបន្តិចថា គិតត្រឹមខែសីហា ឆ្នាំ២០២៣ សកលវិទ្យាល័យ Fudan University បានបញ្ចេញរបាយការណ៍បញ្ជាក់ថា គំនិតផ្ដួចផ្ដើមខ្សែក្រវ៉ាត់ និងផ្លូវ មានប្រទេសចូលរួមប្រមាណ ១៥៤ប្រទេស ទូទាំងសកលលោក មិនរាប់បញ្ចូលប្រទេសចិនដែលជាអ្នកចាប់ផ្ដើម៕
