នាយករដ្ឋមន្ត្រីថៃ លោក Srettha Thavisin នៅថ្ងៃទី១៦ ខែតុលា បានប្រកាសថា ប្រទេសថៃ នឹងអនុញ្ញាតឱ្យភ្ញៀវទេសចររុស្ស៊ី អាចបន្តការស្នាក់នៅដោយគ្មានទិដ្ឋាការពី ៣០ ទៅ ៩០ ថ្ងៃ ដោយវិធានការនេះ នឹងត្រូវចាប់ពីថ្ងៃទី១ ខែវិច្ឆិកា ឆ្នាំ ២០២៣ ដល់ថ្ងៃទី៣០ ខែមេសា ឆ្នាំ ២០២៤។ នេះបើតាមចុះផ្សាយពីសារព័ត៌មាន VNA ។
ថ្លែងបន្ទាប់ពីកិច្ចប្រជុំគណៈរដ្ឋមន្ត្រី លោក Srettha បានបញ្ជាក់ថា ការពន្យារទិដ្ឋាការសម្រាប់ភ្ញៀវទេសចររុស្ស៊ី នឹងជួយជំរុញដល់វិស័យទេសចរណ៍របស់ប្រទេសថៃបន្ថែមទៀត។
លោក Srettha បាននិយាយទៀតថា នេះជាពេលវេលាត្រឹមត្រូវសម្រាប់ការអនុវត្តគោលនយោបាយលើកលែងទិដ្ឋាការសម្រាប់ភ្ញៀវទេសចររុស្ស៊ី នៅពេលដែលភ្ញៀវទេសចរទាំងនោះ កំពុងគេចចេញពីរដូវរងារត្រជាក់ខ្លាំង នៅក្នុងប្រទេសរបស់ពួកគេ ដែលជាធម្មតាចាប់ផ្តើមនៅក្នុងខែធ្នូ រហូតដល់ខែមីនា។
យោងតាមទិន្នន័យរបស់រដ្ឋាភិបាល បានបង្ហាញថា ប្រទេសថៃបានស្វាគមន៍ភ្ញៀវទេសចរបរទេសជាង ២០ លាននាក់ ក្នុងរយៈពេល ៩ ខែដំបូងនៃឆ្នាំ ២០២៣ នេះ ដែលក្នុងនោះភ្ញៀវទេសចររុស្ស៊ីជាប់ចំណាត់ថ្នាក់ទី៥ ដែលមានចំនួនជិត ៩៩៥ ០០០ នាក់ ស្របពេលភ្ញៀវទេសចរម៉ាឡេស៊ី មកកាន់ប្រទេសថៃ មានចំនួនច្រើនជាងគេ (៣,២លាននាក់)តាមពីក្រោយដោយប្រទេសចិន (២,៥ លាននាក់) សាធារណរដ្ឋកូរ៉េ (១,១៩ លាននាក់) និងឥណ្ឌា (១,១៦ លាននាក់)។
ជម្រាបជូនផងដែរថា កាលពីពេលកន្លងទៅ ប្រទេសថៃ ក៏បានផ្តល់ការលើកលែងទិដ្ឋាការសម្រាប់ភ្ញៀវទេសចរមកពីប្រទេសចិន និងកាហ្សាក់ស្ថាន ផងដែរ ដោយចាប់ពីថ្ងៃទី២៥ ខែកញ្ញា ឆ្នាំ ២០២៣ ដល់ថ្ងៃទី២៩ ខែកុម្ភៈ ឆ្នាំ ២០២៤ ៕
