រដ្ឋមន្ត្រីការពារជាតិថៃបាននិយាយថា រដ្ឋាភិបាលថៃអាចនឹងប្តូរចិត្តទិញនាវាចម្បាំងជំនួសនាវាមុជទឹកពីប្រទេសចិនវិញ បន្ទាប់ពីក្រុមហ៊ុនផលិតរបស់ចិនមិនអាចបំពាក់ម៉ាស៊ីនដែលជាផលិតផលរបស់អាល្លឺម៉ង់បាន ដូចដែលធ្លាប់បានបញ្ជាក់នៅក្នុងកិច្ចព្រមព្រៀងដើម។ នេះបើតាមការចុះផ្សាយពីប្រភពសារព័ត៌មាន Reuters ។
ប្រទេសថៃបានបង់ប្រាក់ចំនួន ៧ពាន់លានបាត (១៩៣,៧លានដុល្លារ) ដល់ប្រទេសចិន សម្រាប់ការទិញនាវាមុជទឹក Yuan Class S26T ជាមួយនឹងការបំពាក់ម៉ាស៊ីនម៉ាស៊ូតដែលផលិតដោយអាល្លឺម៉ង់ ប៉ុន្តែកិច្ចព្រមព្រៀងនេះត្រូវបានពន្យារពេល នៅពេលដែលអាល្លឺម៉ង់បានហាមឃាត់ការប្រើប្រាស់ម៉ាស៊ីនរបស់ខ្លួនសម្រាប់ការនាំចេញរបស់យោធាចិន។
យ៉ាងណាមិញមូលហេតុនៃការរឹតបន្តឹងនេះ ក៏មានការបញ្ជាក់ពីអនុព័ន្ធការពារជាតិរបស់អាល្លឺម៉ង់លោក Philipp Doert ផងដែរថា ប្រទេសចិនមិនបានសុំ ឬសម្របសម្រួលជាមួយប្រទេសអាល្លឺម៉ង់មុនពេលចុះហត្ថលេខាលើកិច្ចសន្យារវាងថៃនិងចិន ដើម្បីមានសិទ្ធិអាចបំពាក់ម៉ាស៊ីន MTU របស់អាល្លឺម៉ង់ ចូលទៅក្នុងផ្នែកមួយនៃផលិតផលរបស់ពួកគេនោះឡើយ។ នេះបើតាមប្រភពពីគេហទំព័រ New Mandala បានចុះផ្សាយកាលពីពេលកន្លងទៅ។
ក្នុងនោះដែរ នាយករដ្ឋមន្ត្រីនៃរដ្ឋាភិបាលថៃថ្មីលោក ស្រេតថា ថាវីស៊ីន បាននិយាយថា រូបលោកបានស្នើទៅកាន់ទីក្រុងប៉េកាំង នៅក្នុងអំឡុងកិច្ចប្រជុំកំពូលខ្សែក្រវ៉ាត់ និងផ្លូវកាលពីសប្តាហ៍មុនថា ខ្លួនចង់ទិញនាវាចម្បាំង ជំនួសឲ្យនាវាមុជទឹកវិញ។
ជាមួយគ្នា រដ្ឋមន្ត្រីការពារជាតិថៃលោក Sutin Klungsang បានប្រាប់ប្រព័ន្ធផ្សព្វផ្សាយក្នុងស្រុកមួយនៅថ្ងៃអង្គារនេះថា យើងបានស្នើទៅកាន់ប្រទេសចិន ហើយពួកគេកំពុងពិចារណាវា ដូច្នេះពួកយើងនឹងមានការពិភាក្សាបន្ថែមទៀតអំពីផែនការថ្មីនៅសប្តាហ៍ក្រោយ។
រដ្ឋមន្ត្រីការពារជាតិរូបនេះដដែលបាននិយាយកាលពីសប្តាហ៍មុនថា ការទិញនាវាមុជទឹកនឹងត្រូវផ្អាកសិននៅពេលនេះ ហើយការបញ្ជាទិញនឹងបន្តឡើងវិញ ប្រសិនបើការពិភាក្សានៃភាគីទាំងអស់ទទួលបានលទ្ធផលវិជ្ជមាន។
ជម្រាបដែរថា ប្រទេសថៃបានបញ្ចប់កិច្ចព្រមព្រៀងទិញនាវាមុជទឹកដំបូងក្នុងចំណោមនាវាមុជទឹកទាំងបីកាលពីឆ្នាំ ២០១៧ ក្នុងតម្លៃ ១៣,៥ពាន់លានបាត (៣៧៣,៥៥ លានដុល្លារ) ខណៈការបញ្ជាទិញនាវាមុជទឹកពីរផ្សេងទៀតត្រូវបានអនុម័តដោយសភានៅឆ្នាំ ២០២០ ក្នុងតម្លៃ ២២,៥ពាន់លានបាត (៦២២,៥៨លានដុល្លារ)៕
