ក្រុមហ៊ុនអាកាសចរណ៍ធំបំផុតនៅជប៉ុន កើបប្រាក់ចំណេញប្រចាំឆមាសទី១ កប់ពពក

ក្រុមហ៊ុនអាកាសចរណ៍ធំផុតប្រចាំប្រទេសជប៉ុន ANA Holdings បាននិយាយនាថ្ងៃទី៣១ ខែតុលានេះថា ប្រាក់ចំណេញប្រចាំឆមាសទី១ របស់ពួកគេ កើនឡើងរហូតដល់ ៤ដង ក្រោយ​មានការកើនឡើងនៃអត្រាភ្ញៀវទេសចរណ៍បរទេស។

យោងតាមការចុះផ្សាយពីគេហទំព័រ Reuters បានរាយការណ៍ថា ប្រាក់ចំណេញប្រចាំឆមាសទី១ របស់ក្រុមហ៊ុនជប៉ុន មានប្រមាណ ១៤០ពាន់លានយ៉េន ឬប្រហែល ៩៣២លានដុល្លារ។

ជាមួយគ្នានេះ សារព័ត៌មាន TheJapanTimes ក៏បានចុះផ្សាយទៀតថា ក្រុមហ៊ុន ANA Holdings កំពុងរៀបចំផែនការថ្មី ដោយអូសទាញភ្ញៀវទេសចរពីបណ្ដាប្រទេសនៅតំបន់អាស៊ាន ពោលត្រៀមបើកសេវាកម្មថ្មី នៅប្រទេសថៃ ជាមួយនឹងជើងហោះហើរមានតម្លៃសមរម្យ។

ជម្រាបបន្ថែមថា តាំងពីរដ្ឋាភិបាលជប៉ុន លុបចោលវិធានការទប់ស្កាត់កូវីដ ១៩ កំណើនភ្ញៀវទេសចរ ដែលទៅកម្សាន្តនៅទីនោះ មានការកើនឡើងយ៉ាងឆាប់រហ័ស ស្របពេល​តម្លៃលុយយ៉េនធ្លាក់ថ្លៃផង បានធ្វើឲ្យជប៉ុនក្លាយជាគោលដៅទេសចរណ៍ដ៏គួរឲ្យទាក់ទាញ​បំផុតមួយនាពេលបច្ចុប្បន្ន៕