បើយោងទៅតាមលក្ខខណ្ឌរបស់ក្រុមហ៊ុន Tesla បានបញ្ជាក់ថា រាល់អតិថិជនណាដែលទិញរថយន្ត Cybertrucks ហើយលក់រថយន្តរបស់ពួកគេទៅកាន់ភាគគីទីបី ក្នុងអំឡុងមួយឆ្នាំដំបូង នោះអតិថិជននឹងត្រូវក្រុមហ៊ុនប្តឹងឲ្យសងសំណងជាទឹកប្រាក់ ៥ម៉ឺនដុល្លារ។ នេះបើតាមការចុះផ្សាយពីគេហទំព័រ Insider ។
ក្នុងករណីលើកលែង ចំពោះអតិថិជនដែលមានហេតុផលសមរម្យដើម្បីលក់រថយន្ត ក្រុមហ៊ុននឹងទិញយកមកវិញ ក៏ប៉ុន្តែប្រសិនបើ Tesla មិនចង់ទិញរថយន្តនោះ ក្រុមហ៊ុនអាចនឹងយល់ព្រម ឱ្យអតិថិជនលក់វាទៅកាន់ភាគីណាមួយផ្សេងទៀត ដោយពុំមានការទាមទារជាសំណងទឹកប្រាក់អ្វីឡើយ។
បន្ថែមពីនោះ ទស្សនាវដ្តី Fast Company បានរាយការណ៍មកថា ចំពោះមុខងាររថយន្តបើកបរដោយខ្លួនឯង (Full Self-Driving) ដែលមានតម្លៃបង់ប្រចាំខែរហូតដល់ ១៩៩ ដុល្លារ នឹងមិនអាចផ្ទេរទៅកាន់ម្ចាស់ថ្មីបានទេ ដែលជាហេតុនាំឲ្យការលក់មានភាពស្មុគស្មាញ។
ដោយឡែក បើក្រឡេកទៅកាន់ឆ្នាំ ២០១៩ វិញ ដើមឡើយ Tesla បាននិយាយថា រថយន្ត Cybertruck នឹងមានតម្លៃចាប់ពី ៣៩ ៩០០ ដុល្លារក្នុងមួយគ្រឿង ក៏ប៉ុន្តែបច្ចុបន្នវាទំនងជាមានតម្លៃថ្លៃជាងនេះ ដោយសារបំណែកគ្រឿងបង្គុំរថយន្តមានការឡើងថ្លៃ។
រម្លឹកបន្ថែមថា នាយកប្រតិបត្តិក្រុមហ៊ុន Tesla លោក Elon Musk បាននិយាយកាលពីដើមឆ្នាំថា មុនពេលរថយន្ត EV ប្រភេទនេះ អាចរួមចំណែកដ៏សំខាន់ក្នុងលំហូរសាច់ប្រាក់របស់ក្រុមហ៊ុន វាត្រូវការពេលយ៉ាងហោចណាស់ពីមួយឆ្នាំ ទៅមួយឆ្នាំកន្លះ ខណៈនាយកប្រតិបត្តិក្រុមហ៊ុនមួយនេះ សង្ឃឹមថា Cybertruck នឹងអាចផលិតឲ្យបានចំនួនរហូតដល់ទៅ ២៥ ម៉ឺនគ្រឿង ត្រឹមឆ្នាំ ២០២៥ ខាងមុខ៕
