ក្រុមហ៊ុនចិន Li Auto បានប្រកាសកាលពីថ្ងៃទី១៧ ខែវិច្ឆិកានេះថា ពួកគេនឹងចាប់ផ្ដើមផលិតរថយន្តអគ្គិសនីទ្រង់ទ្រាយធំជាលើកដំបូង នាខែកុម្ភៈឆ្នាំក្រោយ ជាមួយនឹងបច្ចេកវិទ្យាថ្មី។
យោងតាមការចុះផ្សាយពីសារព័ត៌មាន Reuters បានបង្ហាញថា រថយន្តអគ្គិសនីដែល Li Auto គ្រោងនឹងផលិតខ្នាតធំនោះ គឺនឹងបំពាក់មកជាមួយនូវបច្ចេកវិទ្យាសាកថ្មលឿន ដើម្បីដោះស្រាយនូវបញ្ហារបស់អតិថិជន។
បច្ចេកវិទ្យាថ្មីដែល Li Auto គ្រោងនឹងបំពាក់ជាមួយយានយន្តរបស់ខ្លួន គឺមានសមត្ថភាពសាកថ្មរយៈពេល ១២នាទី អាចបើកបរបានរហូតដល់ចំងាយ ៥០០គីឡូម៉ែត្រ ខណៈតម្លៃវិញគឺទាបជាង ៦០០ ០០០យ៉ន់ ឬប្រមាណ ៨២ ៨០០ដុល្លារ។
សូមជម្រាបដែរថា តាំងពីបង្កើតក្រុមហ៊ុនក្នុងឆ្នាំ២០១៥ Li Auto មានរថយន្តតែ ៤ប្រភេទប៉ុណ្ណោះ សម្រាប់ផ្ដល់ជូនអតិថិជន ប៉ុន្តែពួកគេទទួលបានការគាំទ្រខ្លាំង ពោលកាលពីត្រីមាសទី៣ បានប្រកាសពីប្រាក់ចំណេញប្រមាណ ២,៨២ពាន់លានយ៉ន់ ឬប្រហែល ៣៩០លានដុល្លារ៕
