មហាសេដ្ឋីអាមេរិក លោក Jeff Bezos ត្រូវបានគេរំពឹងថា នឹងបន្តដកចេញភាគហ៊ុនរបស់ខ្លួនបន្ថែមទៀត នៅក្នុងក្រុមហ៊ុន Amazon បន្ទាប់ពីលោកបានលក់ចេញភាគហ៊ុន ដែលមានតម្លៃប្រហែល ២៤០លានដុល្លារ កាលពីសប្តាហ៍មុន។ នេះបើតាមការចុះផ្សាយពីសារព័ត៌មាន Reuters។
ប្រភពដដែលនេះ បានរាយការណ៍ទៀតថា លោក Bezos អាចនឹងលក់ភាគហ៊ុនចន្លោះពី ៨ ទៅ ១០លានហ៊ុន ដែលស្មើទៅនឹងចំនួនទឹកប្រាក់ជាង ១ពាន់លានដុល្លារ។
យ៉ាងណាមិញ ជុំវិញការលក់ភាគហ៊ុនចុងក្រោយនេះ អ្នកតំណាងរបស់លោក Bezos មិនទាន់បានធ្វើការឆ្លើយតបភ្លាមៗនោះឡើយ ចំពោះសំណើសុំឲ្យមានការអត្ថាធិប្បាយរបស់សារព័ត៌មាន Reuters ចំពេលដែលតម្លៃភាគហ៊ុនរបស់ Amazon បានធ្លាក់ចុះទាបជាង ២,៥% កាលពីថ្ងៃអង្គារកន្លងទៅ។
បន្ទាប់ពីបានលាឈប់ពីតំណែងជានាយកប្រតិបត្តិរបស់ Amazon លោក Bezos បាននិងកំពុងបន្តដកចេញភាគហ៊ុនរបស់ខ្លួន នៅក្នុងក្រុមហ៊ុនបច្ចេកវិទ្យាខ្នាតយក្សរបស់អាមេរិកមួយនេះ ដើម្បីផ្តល់មូលនិធិទៅកាន់ក្រុមហ៊ុនអវកាល Blue Origin ជំនួសវិញ។
ជម្រាបជូនផងដែរថា កាលពីដើមខែនេះ លោក Bezos បាននិយាយថាលោកកំពុងផ្លាស់ទៅរស់នៅទីក្រុង Miami វិញ ដើម្បីបាននៅជិតឪពុកម្តាយរបស់លោក និងផ្តោតទៅលើស្ថានីយអវកាសរបស់ក្រុមហ៊ុន Blue Origin ៕
