ក្រុមអ្នកគាំទ្ររបបយោធាក្នុងប្រទេសមីយ៉ាន់ម៉ា បានធ្វើបាតុកម្មប្រឆាំងនឹងប្រទេសចិន ដោយពួកគេបានអះអាងថា ក្រុងប៉េកាំងបាននឹងកំពុងគាំទ្រដល់កងកម្លាំងប្រឆាំងរបបយោធា ស្របពេលដែលការប្រយុទ្ធគ្នារវាងកងទ័ពរបស់របបយោធា និងក្រុមសកម្មប្រយុទ្ធជនជាតិភាគតិច នៅតែបន្តកើនឡើង។ នេះបើតាមការចុះផ្សាយពីសារព័ត៌មាន NHK ។
ប្រព័ន្ធផ្សព្វផ្សាយក្នុងប្រទេសមីយ៉ាន់ម៉ាបាននិយាយថា មនុស្សរាប់សិបនាក់បានប្រមូលផ្តុំគ្នានៅមុខស្ថានទូតចិននៃទីក្រុងយ៉ាំងហ្គោន កាលពីថ្ងៃអាទិត្យ និងបានធ្វើការចោទប្រទេសចិនថា បានលូកដៃចូលក្នុងកិច្ចការផ្ទៃក្នុងរបស់មីយ៉ាន់ម៉ា។
ដោយឡែក ការរិះគន់ជាសាធារណៈចំពោះទីក្រុងប៉េកាំងបែបនេះ គឺកម្រមាននៅក្នុងប្រទេសមីយ៉ាន់ម៉ាណាស់ ត្បិតបាតុកម្មដែលគ្មានការអនុញ្ញាតត្រូវបានហាមប្រាមចាប់តាំងពីរដ្ឋប្រហារឆ្នាំ ២០២១ មកម្លេះ ណាមួយចិនជាប្រទេសមួយក្នុងចំណោមប្រទេសដ៏ទៃទៀត ដែលបានរក្សាទំនាក់ទំនងដ៏ល្អជាមួយនឹងរបបយោធា។
យ៉ាងណាមិញ របបយោធាបាននឹងកំពុងតស៊ូជាមួយពួកសកម្មប្រយុទ្ធនៅទូទាំងប្រទេស និងត្រូវបានរងការវាយប្រហារដោយជនជាតិភាគតិចចំនួនបី នៅក្នុងរដ្ឋ Shan ភាគខាងកើតចាប់តាំងពីចុងខែតុលាមក៕
