អាជ្ញាធរទេសចរណ៍ថៃ (TAT) បាននិយាយកាលពីថ្ងៃទី២៤ ខែវិច្ឆិកាកន្លងទៅថា ប្រទេសថៃ រំពឹងថានឹងមានភ្ញៀវទេសចរចិន ចន្លោះពី ៣,៤ លាននាក់ ទៅ ៣,៥ លាននាក់ប៉ុណ្ណោះ នៅឆ្នាំនេះ ពោលគឺទាបជាងគោលដៅចំនួន ៥ លាននាក់ ដែលបានកំណត់កាលពីដើមឆ្នាំនេះកន្លងទៅ បើទោះបីជាវិធានការលើកលែងទិដ្ឋាការត្រូវបានដាក់ចេញក៏ដោយ។ នេះបើតាមការចុះផ្សាយពីសារព័ត៌មាន VNA ។
របាយការណ៍ពី TAT បានបង្ហាញឱ្យដឹងទៀតថា គិតរហូតមកដល់ពេលនេះ ភ្ញៀរទេសចរចិនប្រហែល ៣,០១ លាននាក់ បានចូលមកលេងកម្សាន្តនៅក្នុងប្រទេសថៃ ខណ:ពេលដែលប្រទេសចិនគឺជាប្រភពដ៏សំខាន់សម្រាប់ឧស្សាហកម្មទេសចរណ៍របស់ថៃ ដោយកាលពីឆ្នាំ ២០១៩ កន្លងទៅ ភ្ញៀវទេសចរចិន មានចំនួនដល់ទៅ ១១ លាននាក់ឯណោះ។
លោក Chattan Kunjara Na Ayudhya អភិបាលរង TAT ទទួលបន្ទុកផ្នែកទីផ្សារអន្តរជាតិនៅអាស៊ី និងប៉ាស៊ីហ្វិកខាងត្បូង បាននិយាយថា ការធ្លាក់ចុះនៃសេដ្ឋកិច្ចរបស់ប្រទេសចិន បានធ្វើឱ្យប្រជាជនមានក្តីព្រួយបារម្ភអំពីការចំណាយលើវិស័យទេសចរណ៍។
ទន្ទឹមនឹងនេះ លោក Chattan បានបន្ថែមឲ្យដឹងទៀតថា ការបាញ់ប្រហារនៅក្នុងផ្សារទំនើប ក្នុងទីក្រុងបាងកកនាពេលកន្លងទៅ ក៏បានធ្វើឱ្យប៉ះពាល់យ៉ាងខ្លាំងដល់ទំនុកចិត្តភ្ញៀវទេសចរបរទេសផងដែរ៕
