ទីភ្នាក់ងារវាយតម្លៃ S&P Global Ratings បានព្យាករណ៍កាលពីថ្ងៃអង្គារថា ប្រទេសឥណ្ឌាកំពុងតែត្រៀមខ្លួនក្លាយជាមហាអំណាចសេដ្ឋកិច្ចលំដាប់ទី៣ របស់ពិភពលោកត្រឹមឆ្នាំ ២០៣០ ព្រមទាំងផលិតផលក្នុងស្រុក (GDP) ត្រូវបានរំពឹងថា នឹងមានកំណើន ៧% ក្នុងសារពើពន្ធឆ្នាំ ២០២៦ និង ២០២៧ ។ នេះបើយោងតាមការចុះផ្សាយពីប្រភពសារព័ត៌មាន The Economic Times ។
នាពេលបច្ចុបន្ននេះ ឥណ្ឌាជាមហាអំណាចសេដ្ឋកិច្ចឈរនៅលំដាប់លេខរៀងទី ៥ របស់ពិភពលោក តាមពីក្រោយសហរដ្ឋអាមេរិក ចិន អាឡឺម៉ង់ និងជប៉ុន ស្របពេល S&P រំពឹងថា ផលិតផលក្នុងស្រុកសរុបរបស់ឥណ្ឌានាឆមាសទីមួយនៃឆ្នាំ ២០២៤ នឹងមានកំណើន ៦,៤% ហើយរំពឹងទៀតថានឹងមានកំណើនកើនដល់ ៧% នៅក្នុងឆ្នាំសារពើពន្ធ ២០២៦ និង ២០២៧ ។
ការអភិវឌ្ឍន៍ក្របខណ្ឌដឹកជញ្ជូនដ៏រឹងមាំ នឹងក្លាយជាគន្លឹះមួយដ៏សំខាន់ ក្នុងការកែប្រែប្រទេសឥណ្ឌាពីសេដ្ឋកិច្ចដែលគ្រប់គ្រងដោយសេវាកម្ម ទៅជាប្រទេសដែលគ្រប់គ្រងដោយផលិតកម្មវិញ។ ម្យ៉ាងវិញទៀត ការសម្រេចបាននូវសក្តានុពលពេញលេញ នៃទីផ្សារការងាររបស់ប្រទេសឥណ្ឌា នឹងជំរុញជាចម្បងទៅលើការកើនឡើងនៃជំនាញកម្មករ និងការកើនឡើងពីវត្តមានរបស់ស្ត្រីក្នុងវិស័យការងារ។ ភាពជោគជ័យនៅក្នុងវិស័យទាំងពីរនេះ នឹងនាំឲ្យប្រទេសឥណ្ឌាដឹងពីភាគលាភប្រជាសាស្ត្ររបស់ខ្លួន។
លើសពីនេះទៀត កំណើនដ៏រឹងមាំនៃទីផ្សារឌីជីថលក្នុងស្រុករបស់ប្រទេសឥណ្ឌា មានសក្តានុពលក្នុងការជំរុញប្រព័ន្ធអេកូឡូស៊ី នៃការចាប់ផ្តើមអាជីកម្មដែលកំពុងរីកចម្រើនរបស់ខ្លួន ជាពិសេសនៅក្នុងវិស័យហិរញ្ញវត្ថុ និងបច្ចេកវិទ្យាអ្នកប្រើប្រាស់នៅទស្សវត្សក្រោយ។
ជាមួយគ្នានោះ នៅក្នុងរបាយការណ៍ដែលបានចេញផ្សាយកាលពីខែតុលា S&P បាននិយាយថា សេដ្ឋកិច្ចឥណ្ឌានឹងកើនឡើងទ្វេដងដល់ទៅ ៧,៣ ទ្រីលានដុល្លារត្រឹមឆ្នាំ ២០៣០ ពីទំហំ ៣,៥ ទ្រីលានដុល្លារនៅឆ្នាំំ ២០២២ ៕
