នាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុថៃ លោក Srettha Thavisin កាលពីថ្ងៃព្រហស្បតិ៍កន្លងទៅ បាននិយាយថា លោកបានអមដំណើរថ្នាក់ដឹកនាំជាន់ខ្ពស់របស់ក្រុមហ៊ុន Tesla ដើម្បីទស្សនាជុំវិញតំបន់ឧស្សាហកម្ម នៅក្នុងប្រទេសកាលពីសប្តាហ៍មុន សម្រាប់ការវិនិយោគដ៏មានសក្តានុពលមួយ។ នេះបើតាមការចុះផ្សាយពីកាសែត Bangkok Post។
លោក Srettha បានមានប្រសាសន៍ទៀតថា ៖” ខ្ញុំបានធ្វើដំណើរទស្សនកិច្ចជាមួយថា្នក់ដឹកនាំរបស់ Tesla ដើម្បីធ្វើឲ្យពួកគេលង់ចិត្តជាមួយប្រទេសរបស់យើង។ ហើយពួកគេក៏កំពុងស្វែងរកដីទំហំ ២ ០០០ រ៉ៃ (៣២០ ហិកតា) ដើម្បីមកធ្វើការវិនិយោគនាពេលខាងមុខ ផងដែរ”។
គួរឲ្យដឹងថា បន្ទាប់ពីបានជាប់ឆ្នោតឡើងកាន់តំណែងជានាយករដ្ឋមន្ត្រីរបស់ប្រទេសថៃ កាលពីក្នុងខែសីហា លោក Srettha បានធ្វើដំណើរទៅទស្សនកិច្ចនៅសហរដ្ឋអាមេរិក និងបានជួបពិភាក្សាជាមួយស្ថាបនិកក្រុមហ៊ុន Tesla លោក Elon Musk ផងដែរ នៅមួយខែក្រោយមក។
ប្រទេសថៃ ត្រូវបានគេចាត់ទុកថាជាមជ្ឈមណ្ឌលផលិត និងនាំចេញរថយន្តធំជាងគេនៅក្នុងតំបន់ ដោយក្រុមហ៊ុនផលិតរថយន្តជប៉ុនធំៗ រួមមាន Toyota Motor Corp, Isuzu Motors និង Honda Motor បានគ្រប់គ្រងលើវិស័យរថយន្តរបស់ប្រទេសថៃអស់ជាច្រើនទសវត្សរ៍មកហើយ។
ទន្ទឹមនឹងនេះ ប្រទេសក្នុងរយ:ពេលប៉ុន្មានឆ្នាំថ្មីៗនេះ កំពុងមានបំណងបំប្លែងប្រហែលមួយភាគបីនៃផលិតកម្មរថយន្តសរុបប្រចាំឆ្នាំរបស់ខ្លួន ឲ្យទៅជារថយន្តអគ្គិសនី EVs នៅឆ្នាំ ២០៣០ ហើយកំពុងរៀបចំធ្វើការលើកទឹកចិត្តបន្ថែមទៀតដល់ការវិនិយោគសម្រាប់រថយន្ត EV នៅក្នុងប្រទេសរបស់ខ្លួន។
ជម្រាបជូនផងដែរថា រដ្ឋាភិបាលថៃ បានដាក់ចេញនូវផែនការគាំទ្រមួយចំនួនរួចមកហើយ ដូចជាការកាត់បន្ថយពន្ធ និងការឧបត្ថម្ភធន ខណ:វិធានការទាំងនេះ បានជួយទាក់ទាញក្រុមហ៊ុនផលិតរថយន្តអគ្គិសនីចិនធំៗ រួមទាំងក្រុមហ៊ុន BYD និង Great Wall Motor ក្នុងការមកបោះទុនវិនិយោគរាប់ពាន់លានដុល្លារ ដើម្បីសាងសង់រោងចក្រ នៅក្នុងប្រទេសថៃ៕
