ក្រុមហ៊ុន TikTok បានប្រកាសបណ្ដាក់ទុនជាមួយក្រុមហ៊ុនបច្ចេកវិទ្យាធំបំផុតនៅឥណ្ឌូណេស៊ី គឺក្រុមហ៊ុន PT GoTo Gojek Tokopedia ក្នុងទំហំទឹកប្រាក់ប្រមាណ ១,៥ពាន់លានដុល្លារ។ នេះបើតាមការចុះផ្សាយពីសារព័ត៌មាន CNA។
កិច្ចព្រមព្រៀងមួយនេះ កើតឡើងបន្ទាប់ពីឥណ្ឌូណេស៊ីបានប្រកាសហាមឃាត់ការលក់ទំនិញអនឡាញនៅលើបណ្ដាញសង្គមនានា រួមទាំង TikTok ផងកាលពីខែតុលា ដែលធ្វើឲ្យក្រុមហ៊ុនចិនមួយនេះ ត្រូវបង្ខំចិត្តបណ្ដាក់ទុនជាមួយក្រុមហ៊ុនពាណិជ្ជកម្មអេឡិចត្រូនិកនៅក្នុងប្រទេសឥណ្ឌូណេស៊ី ដើម្បីបន្តអាជីវកម្មរបស់ពួកគេ។
ក្រោមកិច្ចព្រមព្រៀងនេះផងដែរ TikTok នឹងទិញភាគហ៊ុនរបស់ក្រុមហ៊ុនឥណ្ឌូណេស៊ីខាងលើ ប្រហែល ៧៥% និងបានក្លាយជាអ្នកគ្រប់គ្រងដ៏ធំម្នាក់ប្រចាំក្រុមហ៊ុន។
សូមជម្រាបដែរថា TikTok គឺជាបណ្ដាញសង្គមដ៏ពេញនិយមមួយនៅឥណ្ឌូណេស៊ី ពោលចំនួនប្រជាជនឥណ្ឌូណេស៊ីមានប្រមាណ ២៧០លាននាក់ ខណៈអ្នកប្រើប្រាស់ TikTok មានរហូតដល់ ១២៥លាននាក់នៅក្នុងប្រទេស៕
