ប្រធានក្រុមហ៊ុន Tesla មហាសេដ្ឋីមានបំផុតលើលោក Elon Musk ត្រៀមចំណាយទឹកប្រាក់ផ្ទាល់ខ្លួនប្រមាណ ១០០លានដុល្លារ ដើម្បីសាងសង់សាលារៀន និងសកលវិទ្យាល័យមួយ នៅរដ្ឋតិចសាស់ បន្ទាប់ពីលោកធ្វើការរិះគន់លើប្រព័ន្ធអប់រំរបស់សហរដ្ឋអាមេរិក។
យោងតាមការចុះផ្សាយពីសារព័ត៌មាន Telegraph បានរាយការណ៍ថា មេធំ Tesla ត្រៀមសាងសង់សាលារៀននៅរដ្ឋតិចសាស់ តាំងពីថ្នាក់បឋមសិក្សា រហូតដល់ថ្នាក់វិទ្យាល័យ ដែលផ្ដោតសំខាន់លើមុខវិជ្ជាវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា ហើយក៏គ្រោងបង្កើតសកលវិទ្យាល័យមួយទៀតផងដែរ។
សំណើសាងសង់សាលារៀនរបស់មហាសេដ្ឋីអាមេរិករូបនេះ បានដាក់ទៅកាន់អាជ្ញាធរប្រចាំតំបន់តាំងពីខែតុលាឆ្នាំមុន ប៉ុន្តែទើបទទួលបានការអនុញ្ញាតកាលពីខែមីនាកន្លងទៅប៉ុណ្ណោះ។
បន្ថែមពីនោះ គម្រោងការរបស់អ្នកមានដាច់គេលើលោកម្នាក់នេះ ក៏ទទួលបានមូលនិធិពីស្ថាប័នសប្បុរសធម៌ ដែលបង្កើតដោយលោកផ្ទាល់ មានឈ្មោះថា The Foundation ហើយ Elon Musk ក៏រំពឹងថា នឹងមានសិស្សានុសិស្សជាច្រើន នឹងចូលរៀននៅសាលារបស់លោក ដោយសង្ឃឹមថា នឹងមានសិស្សក្នុងមួយថ្នាក់ ៥០នាក់។
រំលឹកបន្តិចថា មហាសេដ្ឋី Elon Musk បានរិះគន់លើប្រព័ន្ធអប់រំរបស់អាមេរិកថា ប៉ុន្មានឆ្នាំចុងក្រោយនេះ និស្សិតអាមេរិកដែលបញ្ចប់ការសិក្សា មិនមានសមត្ថភាពគ្រប់គ្រាន់ឡើយ ដោយសារតែការបណ្ដុះបណ្ដាលពីគ្រឹះស្ថានមានភាពធូររលុង៕
