រដ្ឋបាលប្រធានាធិបតីអាមេរិក លោក ចូ បៃដិន កំពុងពិភាក្សាគ្នាលើការដំឡើងពន្ធទំនិញនាំចូល មួយចំនួនពីប្រទេសចិន រាប់បញ្ចូលទាំងរថយន្តអគ្គិសនីផងដែរ។ នេះបើតាមការចុះផ្សាយពីគេហទំព័រ Wall Street Journal។
បច្ចុប្បន្នរថយន្តចិន ដែលនាំចូលទៅកាន់ទឹកដីសហរដ្ឋអាមេរិក តម្រូវឲ្យបង់ពន្ធប្រមាណ ២៥% តាំងពីជំនាន់អតីតប្រធានាធិបតី ដូណាល់ ត្រាំ នៅកាន់អំណាច ហើយវាអាចនឹងបន្តឡើងខ្ពស់ជាងនេះថែមទៀត។
រថយន្តអគ្គិសនីចិន កំពុងមានសន្ទុះយ៉ាងល្អនៅអាមេរិក ក៏ដូចនៅទូទាំងពិភពលោក ដ្បិតតម្លៃធូរថ្លៃ ខណៈបច្ចេកវិទ្យាក៏ទំនើបអស្ចារ្យផងដែរ ពោលក៏មានក្ដីរំពឹងថា ចិនអាចនឹងនាំចេញរថយន្តបានច្រើនជាង ៥លានគ្រឿងនៅក្នុងឆ្នាំនេះថែមទៀត។
ដោយសារសន្ទុះនៃរថយន្តចិនមានការកើនឡើងខ្លាំងពេក ធ្វើឲ្យរថយន្តនៅក្នុងស្រុករបស់អាមេរិក មានភាពលំបាកក្នុងការប្រកួតប្រជែង ដូច្នេះទើបរដ្ឋាភិបាលព្យាយាមទប់ស្កាត់ការនាំចូលរបស់ចិនបែបនេះ។
រំលឹកផងដែរថា រដ្ឋបាលប្រធានាធិបតីអាមេរិកក៏បានពិចារណា បន្ធូរបន្ថយពន្ធលើទំនិញនាំចូលផ្សេងទៀតពីចិនផងដែរ បើសិនជាអាជ្ញាធររកឃើញថា ទំនិញទាំងនោះ មិនប៉ះពាល់ដល់ការប្រកួតប្រជែងខ្លាំងជាមួយក្រុមហ៊ុនក្នុងស្រុក៕
