ក្រោយរងព្យុះភ្លៀងជិតមួយឆ្នាំពេញ ទីបំផុតមហាសេដ្ឋី Gautam Adani បានក្លាយជាកំពូលអ្នកមានដាច់គេនៅប្រទេសឥណ្ឌា ជាមួយទំហំទ្រព្យសម្បត្តិប្រមាណ ៩៧,៦ពាន់លានដុល្លារ ដែលបានកើនឡើងប្រហែល ៧,៧ពាន់លានដុល្លារ ត្រឹមរយៈពេលមួយថ្ងៃ។ នេះបើតាមការចុះផ្សាយពីសារព័ត៌មាន Bloomberg។
រយៈពេល ៥ថ្ងៃដំបូង នៃឆ្នាំ២០២៣នេះ ម្ចាស់ក្រុមហ៊ុន Adani Group មានកំណើនទ្រព្យសម្បត្តិរហូតដល់ទៅ ១៣,៣ពាន់លានដុល្លារ ច្រើនជាងមហាសេដ្ឋីដទៃទៀត បន្ទាប់ពីតុលាការកំពូលសម្រេចថា ការចោទប្រកាន់របស់ក្រុមហ៊ុន Hindenburg Research ទៅលើលោក Adani ជុំវិញការកេងបន្លំទិន្នន័យផ្សារហ៊ុន និងអំពើពុករលួយ គឺជារឿងមិនពិត និងជាការចោទប្រកាន់គ្មានមូលដ្ឋាន។
ក្រោយដំណឹងមួយនេះបានចេញផ្សាយជាសាធារណៈ តម្លៃហ៊ុនរបស់ក្រុមហ៊ុន Adani Group មានការកើនឡើងជាខ្លាំង និងបានជំរុញកំណើនទ្រព្យសម្បត្តិមហាសេដ្ឋីឥណ្ឌារូបនេះ ឡើងខ្ពស់កប់ពពក។
រំលឹកបន្តិចថា កាលពីខែមករា ឆ្នាំ២០២៣ ក្រុមហ៊ុន Hindenburg Research បានចេញឯកសារជាច្រើន ចោទប្រកាន់មហាសេដ្ឋីឥណ្ឌារូបនេះថា បានបន្លំទិន្នន័យផ្សារហ៊ុន និងឆបោកអតិថិជន ដែលធ្វើឲ្យក្រុមហ៊ុន Adani Group ខាតបង់ទឹកប្រាក់រហូតដល់ ១៥០ពាន់លានដុល្លារ ស្របពេលទ្រព្យសម្បត្តិផ្ទាល់ខ្លួនរបស់លោក Gautam Adani បាត់បង់ជាង ១០០ពាន់លានដុល្លារឯណោះ៕
