សារព័ត៌មាន The Nation បានចុះផ្សាយថា ចំនួនអ្នកទេសចរបរទេសសរុបប្រមាណ ៦០ម៉ឺននាក់បានធ្វើដំណើរចូលមកកាន់ទឹកដីនៃប្រទេសថៃ នៅក្នុងរយៈពេលត្រឹមសប្តាហ៍ដំបូងនៃឆ្នាំ២០២៤ ខណៈភ្ញៀវទេសចរភាគច្រើនមកពីប្រទេសចិន។
រដ្ឋមន្ត្រីក្រសួងទេសចរណ៍ និងកីឡាលោក Sudawan Wangsuphakijkosal បាននិយាយកាលពីថ្ងៃទី៩ ខែមករាថា ភ្ញៀវទេសចរបរទេសសរុបចំនួន ៦០៥ ៥៣៧នាក់បានធ្វើដំណើរមកកាន់ទឹកដីប្រទេសថៃ បើរាប់ត្រឹមមួយសប្តាហ៍ដំបូងនៃឆ្នាំ២០២៤ គឺចាប់ពីថ្ងៃទី១ ដល់ថ្ងៃទី៧ ខែមករា។ ក៏ប៉ុន្តែចំនួននេះ គឺទាបជាងសប្តាហ៍ចុងក្រោយនៃខែធ្នូ ឆ្នាំ២០២៣ ប្រមាណ២៣,៣២% ឬស្មើរនឹងចំនួន ១៨៤ ១០៦នាក់។
ខាងក្រោមនេះ គឺជាតួលេខនៃប្រទេសដែលជាប្រភពទេសចរណ៍កំពូលៗទាំងប្រាំ ដែលមានប្រជាជនមកកម្សាន្តក្នុងប្រទេសថៃច្រើនជាងគេ នៅត្រឹមមួយសប្តាហ៍ដំបូងនៃខែមករា ឆ្នាំ២០២៤ ក៏ដូចជាបង្ហាញអំពីទិន្នន័យប្រៀបធៀបទៅនឹងសប្តាហ៍ចុងក្រោយក្នុងខែធ្នូ ឆ្នាំ២០២៣ ដែលរូមមាន៖
_ ទេសចរចិនមានចំនួន ៨១ ៨៥៤នាក់ ធ្លាក់ចុះ១៨,៩៦%
_ ទេសចរម៉ាឡេស៊ីមានចំនួន ៦៤ ០៥៣នាក់ ធ្លាក់ចុះ៤៨,១៥%
_ ទេសចររុស្ស៊ីមានចំនួន ៥១ ៤៦៧នាក់ ធ្លាក់ចុះ២,៧%
_ ទេសចរកូរ៉េខាងត្បូងមានចំនួន ៤៣ ៨៩៤នាក់ ធ្លាក់ចុះ ៤,៩៣%
_ និងទេសចរឥណ្ឌាមានចំនួន ៣០ ២០៣នាក់ ធ្លាក់ចុះ ២៣,៧៩%
ទោះជាយ៉ាងនេះក្តី រដ្ឋមន្ត្រីក្រសួងទេសចរណ៍ និងកីឡារូបនេះរំពឹងថា ការមកដល់របស់ជនបរទេសនឹងកើនឡើងក្នុងសប្តាហ៍ទីពីរនៃខែមករា ដោយសារការលើកលែងទិដ្ឋាការសម្រាប់អ្នកទេសចរមកពីប្រទេសចិន និងកាហ្សាក់ស្ថាន ហើយមួយវិញទៀត ចំពោះគោលនយោបាយពន្យារទិដ្ឋាការស្នាក់នៅសម្រាប់ភ្ញៀវទេសចររុស្ស៊ី ព្រមទាំងការមកដល់កាន់តែច្រើនពីប្រទេសដែលនៅតំបន់ឆ្ងាយៗ ក៏នឹងរួមចំណែកដល់កំណើនភ្ញៀវទេសចរបរទេសឲ្យមកកាន់ប្រទេសថៃកើនឡើងបន្ថែមទៀតផងដែរ៕
