នាយកប្រតិបត្តិក្រុមហ៊ុន Google លោក Sundar Pichai បានប្រាប់ទៅកាន់ក្រុមបុគ្គលិកថា ត្រូវត្រៀមចិត្តឲ្យរួចរាល់ ដ្បិតក្រុមហ៊ុនបុត្រសម្ព័ន្ធរបស់ក្រុមហ៊ុនយក្ស Alphabet មានគម្រោងកាត់បន្ថយបុគ្គលិកជាច្រើននាក់ទៀត នៅក្នុងឆ្នាំ២០២៤។ នេះបើតាមការចុះផ្សាយពីសារព័ត៌មាន The Verge។
CEO ក្រុមហ៊ុនបច្ចេកវិទ្យាមួយនេះ ក៏បានបង្ហើបថា ការជំរុះបុគ្គលិកនៅក្នុងឆ្នាំនេះ គឺមិនមានចំនួនច្រើនដូចឆ្នាំមុនឡើយ ប៉ុន្តែក្រុមហ៊ុននៅតែត្រូវបង្ខំចិត្តដកបុគ្គលិកមួយចំនួន តាមផ្នែកដែលមិនចាំបាច់ និងផ្ដោតលើការផលិតបច្ចេកវិទ្យា AI ជំនួសវិញ។
បន្ថែមពីនោះសារព័ត៌មាន Reuters ក៏បានរាយការណ៍ទៀតថា ការកាត់បន្ថយបុគ្គលិករបស់ Google នៅឆ្នាំនេះ ហាក់ជាសញ្ញាបង្ហាញឲ្យដឹងថា ក្រុមហ៊ុនធំៗកំពុងមមាញឹក ផលិតយានយន្ត និងបច្ចេកវិទ្យាទំនើបៗ សម្រាប់ជំនួសការងាររបស់មនុស្សធម្មតា។
សូមជម្រាបដែរថា កាលពីខែកញ្ញ ឆ្នាំ២០២៣ ក្រុមហ៊ុន Google បានកាត់បន្ថយបុគ្គលិករហូតដល់ជាង ១៨ម៉ឹននាក់ ខណៈផែនការកាត់បន្ថយបុគ្គលិកសម្រាប់ឆ្នាំ២០២៤ នៅមិនទាន់ទម្លាយពីចំនួនជាក់លាក់នៅឡើយទេ៕
