កាលពីថ្ងៃទី២៥ ខែមករា តម្លៃហ៊ុនរបស់ក្រុមហ៊ុនរថយន្តអគ្គិសនី Tesla មានការថយចុះរហូតដល់ ១២% បន្ទាប់ពីមហាសេដ្ឋី Elon Musk ព្រមានពីការលក់នៅក្នុងឆ្នាំនេះ នឹងមានកំណើនយឺតជាងមុន ធ្វើឲ្យក្រុមហ៊ុនមួយនេះខាតលុយអស់ ៨០ពាន់លានដុល្លារ។
យោងតាមការចុះផ្សាយពីសារព័ត៌មានCNA បានបង្ហាញថា មេធំក្រុមហ៊ុន Tesla បានព្រមានថា អត្រាលក់រថយន្តរបស់ Tesla កំពុងប្រឈមនឹងការងើបឡើងយឺត ដោយសារតម្រូវការមានតិចនៅលើទីផ្សារប្រទេសចិន ក៏ដូចជាគូប្រជែងធំៗដូចជា BYD ជាដើម គឺលក់រថយន្តនៅក្នុងតម្លៃទាប ជាងក្រុមហ៊ុនរបស់ខ្លួន។
ជាមួយគ្នា មហាសេដ្ឋីមានបំផុតនៅលើលោករូបនេះ ក៏បានបង្ហើបដែរថា ក្រុមហ៊ុន Tesla ក៏កំពុងត្រៀមផលិតរថយន្តដែលមានតម្លៃទាប សម្រាប់ប្រជែងជាមួយក្រុមហ៊ុនចិនផងដែរ ដោយគ្រោងនឹងចេញលក់រថយន្តថ្មីនោះ នៅពាក់កណ្ដាលឆ្នាំ២០២៥។
រំលឹកបន្តិចថា កាលពីពេលថ្មីៗនេះ លោក Elon Musk ធ្លាប់បង្ហាញពីក្ដីបារម្ភលើទីផ្សាររថយន្តអគ្គិសនី ដោយអះអាងថា ចិនអាចនឹងដណ្ដើមបានទីផ្សាររថយន្តនៅលើពិភពលោក បើសិនជាមិនមានរបាំងពាណិជ្ជកម្មត្រឹមត្រូវ នៅលើទីផ្សាររថយន្តអន្តរជាតិ ដ្បិតបច្ចុប្បន្នរថយន្តចិនកំពុងត្រូវប៉ាន់ ដោយសារតម្លៃទាប ហើយបច្ចេកវិទ្យាក៏មិនចាញ់ក្រុមហ៊ុនធំៗរបស់អាមេរិកផងដែរ៕
