តម្រូវការមាសជាសកលនៅក្នុងឆ្នាំ២០២៣ មានការថយចុះប្រមាណ ៥% មកនៅត្រឹមចំនួន ៤ ៤៤៨,៤តោនប៉ុណ្ណោះ ខណៈទិន្នន័យមួយនេះមិនរាប់បញ្ចូលពីការជួញដូរនៅលើទីផ្សារផ្ទាល់ រវាងអ្នកលក់ និងអ្នកទិញ ឬហៅថាទីផ្សារ OTC។ នេះបើតាមការចុះផ្សាយពីសារព័ត៌មាន CNA។
ជាមួយគ្នា គណៈកម្មការមាសពិភពលោក ហៅកាត់ WGC បានដាក់ក្ដីរំពឹងថា តម្រូវការមាសនឹងមានសន្ទុះឡើងវិញនាឆ្នាំនេះ ដោយសារវិបត្តិសង្គ្រាម និងការបោះឆ្នោតជ្រើសរើសមេដឹកនាំ ច្រើនជាង ៦០ប្រទេស នឹងចាប់ផ្ដើមនៅក្នុងឆ្នាំ២០២៤ នេះ។
WGC ក៏បានរាយការណ៍ដែរថា បើសិនជារាប់បញ្ចូលទិន្នន័យពីទីផ្សារ OTC តម្រូវការមាសក្នុងឆ្នាំ២០២៣ មានការកើនឡើង ៣% ដល់ចំនួន ៤ ៨៩៨,៨តោន ស្របពេលតម្លៃវិញ គឺកើនដល់ចំណុចខ្ពស់មិនធ្លាប់មាន ពោលជាមធ្យមគឺមានតម្លៃ ១ ៩៤០ដុល្លារក្នុងមួយអោន។
បន្ថែមពីនោះ សារព័ត៌មាន Reuters ក៏បានព្យាករទុកថា តម្លៃមាសជាមធ្យមនៅក្នុងឆ្នាំ២០២៤ អាចកើនដល់ ២ ០៥៣ដុល្លារក្នុងមួយអោន ខណៈកាលពីខែធ្នូឆ្នាំមុន តម្លៃរបស់មាសឡើងដល់ចំណុចខ្ពស់បំផុត ប្រមាណ ២ ១៣៥ដុល្លារ ក្នុងមួយអោន៕
