ក្រុមហ៊ុន Toyota កាលពីថ្ងៃអង្គារ ទី៦ ខែកុម្ភ:កន្លងទៅនេះ បានបង្កើនការព្យាករទុករបស់ខ្លួនពីប្រាក់ចំណេញប្រចាំឆ្នាំ ថាអាចនឹងឈានដល់កម្រិតខ្ពស់បំផុត ដោយសារតែការលក់កើនឡើងនៅគ្រប់តំបន់ទាំងអស់ទូទាំងពិភពលោក ចំពេលបញ្ហាកង្វះខាតបន្ទះឈីប Semiconductor សកលលោកហាក់មានភាពធូរស្រាលច្រើន។ នេះបើតាមការចុះផ្សាយពីសារព័ត៌មាន Reuters។
ក្រុមហ៊ុនផលិតរថយន្តខ្នាតយក្សជប៉ុនមួយនេះ រំពឹងថាអាចនឹងកត់ត្រាប្រាក់ចំណេញរបស់ខ្លួនបានចំនួន ៤,៥ទ្រីលានយ៉េន ឬប្រមាណ ៣០ពាន់លានដុល្លារ នៅឆ្នាំហិរញ្ញវត្ថុ ២០២៤ នេះ ពោលគឺជាចំនួនកើនឡើងពីការព្យាករពីមុន ៣,៩៥ទ្រីលានយ៉េន។
គួរឲ្យដឹងថា ការផលិតយានយន្តបានស្ទុះងើបឡើងវិញយ៉ាងខ្លាំង ដោយសារតែមានកើនឡើងនៃការផ្គត់ផ្គង់បន្ទះឈីប semiconductor ឡើងវិញ ខណ:កាលពីសប្តាហ៍មុន ក្រុមហ៊ុន Toyota បានប្រកាសពីការលក់រថយន្តរបស់ខ្លួនសរុបចំនួន ១១,២ លានគ្រឿង សម្រាប់គ្រប់ម៉ូដែលទាំងអស់ ក្នុងឆ្នាំ២០២៣ និងថែមទាំងបានរក្សាឈ្មោះជាក្រុមហ៊ុនផលិតរថយន្តដែលលក់ដាច់ខ្លាំងបំផុតរបស់ពិភពលោក ថែមទៀតផង។
ជម្រាបជូនផងដែរថា បើទោះបីជាការលក់រថយន្ត នៅអឺរ៉ុប និងអាមេរិកខាងជើង ត្រូវបានគេរំពឹងថានឹងកើនឡើងក៏ដោយ តែការថយចុះនៃការលក់ក្នុងស្រុក បានធ្វើឲ្យក្រុមហ៊ុន Toyota កាត់បន្ថយបរិមាណលក់ សម្រាប់ចន្លោះឆ្នាំ ២០២៣ ដល់ ២០២៤ របស់ខ្លួនមកនៅត្រឹម ៩,៤៥ លានពីចំនួន ៩,៦០ លានគ្រឿង៕
