មហាសេដ្ឋីអាមេរិក លោក Elon Musk គឺជាស្ដេចត្រាញ់កំពូលមួយរូបក្នុងវិស័យបច្ចេកវិទ្យា និងមានប្រភពចំណូលជាច្រើន ដែលធ្វើឲ្យលុយរបស់លោកមានលំហូរឥតឈប់ឈរ បើទោះជាអង្គុយផឹកកាហ្វេលេង មិនធ្វើការងារក៏ដោយ។
យោងតាមការចុះផ្សាយពីសារព័ត៌មាន Finbold បានបង្ហាញថា ម្ចាស់ក្រុមហ៊ុន Tesla និង SpaceX អាចរកចំណូលបានប្រហែល ៦៩លានដុល្លារក្នុងមួយសប្ដាហ៍ ឬជិត ១០លានដុល្លារដុល្លារក្នុងមួយថ្ងៃ ហើយក្នុងមួយម៉ោងគឺប្រហែល ៤សែនដុល្លារ និងក្នុងមួយនាទីគឺជិត ៧ពាន់ដុល្លារ។
ប្រាក់ចំណូលដ៏ច្រើនរបស់មហាសេដ្ឋីអាមេរិករូបនេះ គឺបានមកពីការកាន់កាប់ចំណែកភាគហ៊ុននៅក្នុងក្រុមហ៊ុនកំពូលៗជាច្រើនដូចជា មានចំណែក ២០,៥%នៅក្រុមហ៊ុន Tesla ៥៤% នៅក្នុងក្រុមហ៊ុន Starlink ៤២% នៅក្រុមហ៊ុន SpaceX ៧៤%នៅក្រុមហ៊ុនបណ្ដាញសង្គម X ច្រើនជាង ៩០% នៅក្រុមហ៊ុន The Boring Company ២៥% នៅក្រុមហ៊ុន xAI និងច្រើនជាង ៥០% នៅក្រុមហ៊ុន Neuralink។
សូមជម្រាបដែរថា បច្ចុប្បន្ន Elon Musk គឺជាមហាសេដ្ឋីមានបំផុតលើលោកទី២ បន្ទាប់ពីមហាសេដ្ឋីបារាំង Bernard Arnault ស្របពេលទ្រព្យសម្បត្តិរបស់មេធំ Tesla មានប្រហែល ២០៥ពាន់លានដុល្លារ។ នេះបើតាមរបាយការណ៍បង្ហាញដោយគេហទំព័រ Forbes៕
