យោងតាមការចុះផ្សាយពីសារព័ត៌មាន CNBC បានបង្ហាញឲ្យដឹងថា រដ្ឋាភិបាលសិង្ហបុរី កំពុងមានផែនការក្នុងការវិនិយោគទឹកប្រាក់ច្រើនជាង ១ពាន់លានដុល្លារសិង្ហបុរី (៧៤៣លានដុល្លារ) ក្នុងការអភិវឌ្ឍបញ្ញាសិប្បនិម្មិត (AI) ក្នុងរយ:ពេល ៥ឆ្នាំខាងមុខ ដើម្បីពង្រឹងជំហររបស់ខ្លួន ក្នុងនាមជាមជ្ឈមណ្ឌលអាជីវកម្ម និងការបង្កើតថ្មីធំបំផុតមួយរបស់ពិភពលោក។
ឧបនាយករដ្ឋមន្ត្រីសិង្ហបុរី លោក Lawrence Wong បានប្រកាសពីផែនការថ្មីនេះ ក្នុងអំឡុងការថ្លែងសុន្ទរកថា ពីការបែងចែកថវិកាថ្មីៗ ដោយកត់សម្គាល់ថា បច្ចេកវិទ្យា AI នេះ គឺជាផ្នែកដ៏សំខាន់មួយនៃការវិនិយោគ ដែលអាចផ្តល់ឲ្យសិង្ហបុរី ទទួលបានសិទ្ធិប្រើប្រាស់បន្ទះឈីបកម្រិតខ្ពស់ និងធ្វើការជាមួយក្រុមហ៊ុនឈានមុខគេនៅក្នុងស្រុក និងជុំវិញពិភពលោក ដើម្បីបង្កើតមជ្ឈមណ្ឌល AI ដ៏ល្អឥតខ្ចោះ ដើម្បីជំរុញដល់ការបង្កើតថ្មី។
ទន្ទឹមនឹងនេះ លោក Nithin Chandra ជាប្រធានគ្រប់គ្រងប្រចាំតំបន់អាស៊ីអាគ្នេយ៍របស់ក្រុមហ៊ុនប្រឹក្សា Kearney បាននិយាយផងដែរថា គំនិតផ្តួចផ្តើមក្នុងការវិនិយោគលើប្រព័ន្ធ AI នេះ នឹងអាចជួយធានាដល់អាជីវកម្មជាច្រើន ក្នុងការទាញយកប្រយោជន៍ ពីឱកាសដែលទទួលបានដោយការរីកចម្រើនផ្នែកបច្ចេកវិទ្យា និងចាប់យកឱកាសថ្មីៗបន្ថែមទៀត។
យោងតាម CNBC បានបង្ហាញឲ្យដឹងទៀតថា សិង្ហបុរីគឺជាប្រទេសមួយក្នុងចំណោមប្រទេសដំបូងគេដែលបានបោះពុម្ពផ្សាយពីផែនការវិនិយោគលើ AI ចាប់តាំងពីឆ្នាំ២០១៩ មក ហើយក្នុងខែធ្នូ ឆ្នាំ២០២៣កន្លងទៅ ប្រទេសក្នុងតំបន់អាស៊ីអាគ្នេយ៍មួយនេះ បានចាប់ផ្តើមនូវយុទ្ធសាស្ត្រ AI ថ្នាក់ជាតិជំនាន់ 2.0 ដែលជាកំណែអភិវឌ្ឍចុងក្រោយមួយនៃប្រព័ន្ធ AI របស់ខ្លួន ដោយបង្ហាញពីវិធីរៀបចំសេដ្ឋកិច្ចដើម្បីប្រើប្រាស់ និងទាញយកប្រយោជន៍ពី AI ក្នុងការជួយដល់កម្មករ និងអាជីវកម្ម នៅក្នុងប្រទេស៕
