មហាសេដ្ឋីវៀតណាមគ្រោងចាយជិត ៦ពាន់លានដុល្លារ ទិញយន្តហោះបន្ថែម ២០គ្រឿង

ក្រុមហ៊ុនអាកាសចរណ៍វៀតណាម VietJet របស់មហាសេដ្ឋី Nguyen Thi Phuong Thao កំពុងមានគម្រោងចាយលុយជិត ៦ពាន់លានដុល្លារ ទិញយន្តហោះបន្ថែមចំនួន ២០គ្រឿង។ នេះបើតាមការចុះផ្សាយពីគេហទំព័រ Forbes។

ក្រុមហ៊ុន VietJet កំពុងត្រៀមថវិកា ៥,៩ពាន់លានដុល្លារ ដើម្បីទិញយន្តហោះប្រភេទ A330-900 ពីក្រុមហ៊ុន Airbus ចំនួន ២០គ្រឿង ដើម្បីជំនួសយន្តហោះម៉ូដែលចាស់ A330-300 របស់ខ្លួន។

ដោយឡែក ក្រុមហ៊ុន Airbus ក៏បានចេញមុខបង្ហើបថា កិច្ចព្រមព្រៀងរវាងក្រុមហ៊ុនទាំង២ កំពុងស្ថិតនៅក្នុងការចរចា ក៏ប៉ុន្តែវាគ្រោងនឹងសម្រេចជាផ្លូវការនាពេលប៉ុន្មានសប្ដាហ៍ខាងមុខ ហើយការដឹកជញ្ជូនយន្តហោះដំបូងពីក្រុមហ៊ុនអឺរ៉ុប មកកាន់ក្រុមហ៊ុនវៀតណាម នឹងធ្វើឡើងនៅឆ្នាំ២០២៦។

សូមជម្រាបដែរថា បើសិនជាកិច្ចព្រមព្រៀងមួយនេះជោគជ័យ វានឹងក្លាយជាការទិញយន្តហោះធំបំផុតរបស់ក្រុមហ៊ុន VietJet ខណៈបច្ចុប្បន្ននេះ ក្រុមហ៊ុនមានយន្តហោះប្រមាណ ១១០គ្រឿង កំពុងចរាចរនៅលើផ្លូវអាកាសអន្តរជាតិចំនួន ៣០ខ្សែ៕