មហាសេដ្ឋីអាមេរិកវ័យ ៩២ឆ្នាំ ភ្ជាប់ពាក្យជាលើកទី០៦ ក្រោយរកឃើញដៃគូជីវិតថ្មី

មហាសេដ្ឋីអាមេរិក Rupert Murdoch អាយុ ៩២ឆ្នាំ បានប្រកាសភ្ជាប់ពាក្យជាលើកទី០៦ ជាមួយគូដណ្ដឹង Elena Zhukova អាយុ ៦៧ឆ្នាំ ដែលជាជីវវិទូជនជាតិរុស្ស៊ី ចូលនិវត្តមួយរូប។ នេះបើតាមការចុះផ្សាយពីសារព័ត៌មាន New York Times។

ប្រភពដដែលបានបញ្ជាក់ថា ស្ថាបនិកក្រុមហ៊ុន Fox News បានទាក់ទងជាមួយអ្នកនាង Zhukova តាំងពីរដូវក្ដៅឆ្នាំមុន ពោលអ្នកទាំង ២ ទាក់ទងគ្នា ក្រោយលោក Murdoch ប្រកាសផ្ដាច់ពាក្យលើកទី០៥ កាលពីឆ្នាំមុន។

គូស្នេហ៍ថ្មីថ្មោងមួយគូនេះ គឺបានគិតគូរពីកម្មវិធីមង្គលការរួចស្រេចហើយ ដោយត្រៀមរៀបចំឡើងនាខែមិថុនាខាងមុខ ស្របពេលធៀបការ គឺបានប្រគល់ជូនភ្ញៀវជាបណ្ដើរៗ ខណៈកម្មវិធីមួយនេះ គ្រោងធ្វើឡើងនៅចម្ការទំពាំងបាយជូរ របស់មហាសេដ្ឋីអាមេរិក ដែលមានទីតាំងនៅរដ្ឋកាលីហ្វ័រញ៉ា។

សូមជម្រាបដែរថា មហាសេដ្ឋីអាមេរិក Rupert Murdoch ធ្លាប់បានរៀបការ ៤លើករូចហើយមកហើយ និងមានកូនៗចំនួន ៦នាក់ ហើយបច្ចុប្បន្ននេះ លោកមានទ្រព្យសម្បត្តិប្រហែល ១៩ពាន់លានដុល្លារ៕