មហាសេដ្ឋីអាមេរិកលោក Elon Musk អាចនិយាយបានថាជាសហគ្រិនម្នាក់ ដែលមានភាពល្បីល្បាញបំផុតនាពេលសព្វថ្ងៃ ដ្បិតអីលោកកំពុងដឹកនាំក្រុមហ៊ុនបច្ចេកវិទ្យាធំៗនៅក្នុងដៃ ព្រមទាំងមានប្រាក់រាប់ពាន់លានដុល្លារ ហើយពិសេសជាងនេះទៀតនោះ លោកក៏ត្រូវបានគេដឹងថាមានកូនរហូតដល់ទៅ ១១នាក់ឯណោះ។
បើតាមគេហទំព័រ Hollywood Life បានចុះផ្សាយថា លោក Elon Musk បានរៀបការជាមួយអ្នកនិពន្ធជនជាតិកាណាដាលោកស្រី Justin Wilson នៅក្នុងឆ្នាំ២០០០ ហើយត្រូវបានលែងលះគ្នានៅឆ្នាំ២០០៨ អំឡុងពេលនោះពួកគេមានកូនជាមួយគ្នាដល់ទៅ ៥នាក់ តែជាអកុសលកូនដំបូងរបស់អ្នកទាំងពីរ ក៏ត្រូវបានបាត់បង់ជីវិតបន្ទាប់ពីកើតបានរយៈពេល ១០សប្តាហ៍។ តែទោះបីជាយ៉ាងណានៅឆ្នាំ២០០៤ អ្នកទាំងពីរមានកូនភ្លោះចំនួនពីរនាក់ និងមានកូនភ្លោះរហូតដល់ទៅបីនាក់ថែមទៀតនៅឆ្នាំ២០០៦ ។
បន្ទាប់ពីលែងលះលោក Elon Musk ក៏បានរៀបការជាមួយតារាសម្តែងស្រី Talulah Riley ដល់ទីពីរលើកពោលអាពាហ៍ពិពាហ៍ដំបូងមានរយៈពេលចាប់ពីឆ្នាំ២០១០ ដល់ឆ្នាំ២០១២ ហើយអាពាហ៍ពិពាហ៍លើកទីពីរគឺចាប់ពីឆ្នាំ២០១៣ ដល់ឆ្នាំ២០១៦ ។ ថ្វីត្បិតថាបែបនេះមែន តែអ្នកទាំងពីរមិនមានកូនជាមួយនឹងគ្នានោះឡើយ។
ក្រោយមក លោកក៏មានកូនប្រុសស្រីបីនាក់បន្ថែមទៀត ជាមួយតន្ត្រីករជនជាតិកាណាដាដែលមានឈ្មោះថា Grimes ។ លើសពីនោះ លោក Elon Musk ក៏ទទួលបានកូនភ្លោះចំនួនពីរនាក់ជាលើកទីបី ជាមួយនាយកប្រតិបត្តិផ្នែកបច្ចេកវិទ្យារបស់ក្រុមហ៊ុន Neuralink អ្នកនាង Shivon Zilis ។
គួរបញ្ជាក់ថា មហាសេដ្ឋីសម្បូរមន្តស្នេហ៍រូបនេះបច្ចុបន្នមានវ័យ ៥៣ឆ្នាំ កំពុងកាន់កាប់ក្រុមហ៊ុនធំៗជាច្រើននៅក្នុងដៃ តួយ៉ាងក្រុមហ៊ុនផលិតរថយន្តអគ្គិសនី Tesla, ក្រុមហ៊ុន Space X និងក្រុមហ៊ុនបណ្តាញសង្គម X ជាដើម ស្របពេលទ្រព្យសម្បត្តិរបស់លោកគិតត្រឹមថ្ងៃទី១០ ខែមីនា មានរហូតដល់ទៅ ១៩៣,៣ពាន់លានដុល្លារ តាមរយៈការចុះផ្សាយពីទស្សនាវដ្តី Forbes ៕
