ជាងបួនខែដំបូងឆ្នាំនេះ ថៃទទួលភ្ញៀវបរទេសជាង ១០ លាននាក់ កើបចំណូលជាង ១៣ពាន់លានដុល្លារ

យោងតាមក្រសួងទេសចរណ៍ និងកីឡាកររបស់ថៃ បានរាយការណ៍មកថា ភ្ញៀវទេសចរបទេសសរុបជាង ១០ លាននាក់ បានមកដល់ប្រទេសថៃ សម្រាប់រយ:ពេលជាងបួនខែដំបូងឆ្នាំនេះ ដោយនាំមកនូវប្រាក់ចំណូលប្រមាណជាង ៥០០ពាន់លានបាត ឬស្មើនឹង ១៣,៥ពាន់លានដុល្លារ។ នេះបើតាមការចុះផ្សាយពីសារព័ត៌មាន VNA។

យោងតាមទិន្នន័យពីក្រសួង ប្រទេសថៃ បានស្វាគមន៍ភ្ញៀវបរទេសសរុបចំនួន ១០ ៧២៣ ៩៥៣ នាក់ គិតចាប់ពីថ្ងៃទី១ ខែមករា ដល់ថ្ងៃទី១៤ ខែមេសា ដែលបង្កើតប្រាក់ចំណូលដល់រដ្ឋចំនួន ៥១៨ពាន់លានបាត។

គួរឲ្យដឹងផងដែរថា ក្នុងចំណោមភ្ញៀវបរទេសសរុប ជនជាតិចិន ឈរនៅចំណាត់ថ្នាក់លេខ១ ដោយមានចំនួនជាង ២ លាននាក់ និងបន្ទាប់មកជាជានជាតិម៉ាឡេស៊ី មានចំនួន ១,៣៩ លាននាក់ , រុស្ស៊ី មានចំនួន ៦៩៥ ៦២៤ នាក់ , កូរ៉េខាងត្បូង ៦១៩​ ១៨៦ នាក់ និងឥណ្ឌា ៥៤៦ ៩៣៥ នាក់។​

រដ្ឋមន្ត្រីក្រសួងទេសចរណ៍ និងកីឡា លោក Sudawan Wangsuphakijkosol បាននិយាយថា ភ្ញៀវទេសចរបរទេសសរុបចំនួន ៧៣៥ ៨០២ នាក់ បានមកលេងប្រទេសថៃ ចន្លោះថ្ងៃទី៨ ដល់ថ្ងៃទី១៤ ខែមេសា ឬជាមធ្យម ១០៥ ១១៥នាក់ ក្នុងមួយថ្ងៃ បើធៀបនឹងសប្តាហ៍មុន ដែលមានចំនួន ៦១៧ ៨០០នាក់ ឬកើនឡើងប្រហែល ១៩%៕