គណៈកម្មការប្រយុទ្ធប្រឆាំងអំពើពុករលួយម៉ាឡេស៊ី (MACC) បានលើកឡើងថា អតីតនាយករដ្ឋមន្ត្រីម៉ាឡេស៊ីលោក Mahathir Mohamad កំពុងតែស្ថិតនៅក្នុងចំណោមបុគ្គលដែលត្រូវស៊ើបអង្កេត ទាក់ទិននឹងអំពើពុករលួយដែលពាក់ព័ន្ធនឹងកូនប្រុសរបស់ខ្លួន។ នេះបើតាមការចុះផ្សាយពីសារព័ត៌មាន CNA ។
កាលពីថ្ងៃទី២៥ ខែមេសាប្រធានស្នងការរបស់ MACC លោក Azam Baki បានបដិសេធមិនបញ្ជាក់លម្អិតឲ្យច្បាស់លាស់ អំពីការស៊ើបអង្កេតទៅលើលោក Mahathir ឬកូនប្រុសរបស់គាត់នោះទេ ក៏ប៉ុន្តែបានប្រាប់អ្នកសារព័ត៌មានតាមទូរទស្សន៍ថា៖ “សូមអនុញ្ញាតឲ្យការស៊ើបបានបញ្ចប់រួចរាល់ជាមុនសិន រហូតដល់ពេលវេលាណាមួយសមស្រប អាចឲ្យពួកយើងបញ្ជាក់ពីភាពពិតក្នុងករណីនេះបាន”។
យ៉ាងណា ការបន្តសង្ស័យលើអតីតមេដឹកនាំរូបនេះយ៉ាងដូច្នេះ ក៏ដោយសារតែកាលពីខែមករាកន្លងទៅ MACC បានជូនដំណឹងទៅដល់កូនប្រុសរបស់លោក Mahathir គឺលោក Mirzan និងលោក Mokhzani ឲ្យធ្វើការប្រកាសទ្រព្យសម្បត្តិរបស់ពួកគេ ដើម្បីស៊ើបអង្កេតលើកំណត់ត្រាប្រតិបត្តិការហិរញ្ញវត្ថុ ទ្រព្យសម្បត្តិទាំងក្នុង និងក្រៅប្រទេស រួមទាំងអាជីវកម្មផ្សេងៗផងដែរ។
គួរជម្រាបទៀតថា ការស៊ើបអង្កេតនេះ កើតឡើងចំពេលដែលមានការបង្ក្រាបកាន់តែទូលំទូលាយលើបញ្ហាអំពើពុករលួយ ដែលពាក់ព័ន្ធនឹងឥស្សរជននយោបាយជាន់ខ្ពស់ រួមទាំងអ្នកស្និទ្ធស្នាលនឹងមេដឹកនាំជើងចាស់វ័យ ៩៨ឆ្នាំលោក Mahathir ដែលត្រូវបានគេស្គាល់ទៀតថា ជាគូប្រជែងដ៏ស្វិតស្វាញនៅលើឆាកនយោបាយជាយូរមកហើយ ជាមួយនាយករដ្ឋមន្ត្រីបច្ចុប្បន្នលោក Anwar Ibrahim ៕
