នាយកប្រតិបត្តិរបស់ក្រុមហ៊ុន Microsoft លោក Satya Nadella បាននិយាយថា ក្រុមហ៊ុនរបស់លោកនឹងបោះទុនវិនិយោគ ១,៧ពាន់លានដុល្លារ នៅក្នុងប្រទេសឥណ្ឌូណេស៊ី ទៅលើសេវាកម្ម Cloud និងបញ្ញាសិប្បនិម្មិត (AI) រួមទាំងការសាងសង់មជ្ឈមណ្ឌលទិន្នន័យផងដែរ។ នេះបើតាមការចុះផ្សាយពីសារព័ត៌មាន CNA។
គួរឲ្យដឹងថា ទីក្រុងហ្សាកាតា គឺជាកន្លែងសំចតដំបូងរបស់លោក Nadella ក្នុងដំណើរទស្សនកិច្ចមកកាន់បណ្តាប្រទេសក្នុងតំបន់អាស៊ីអាគ្នេយ៍ មុនពេលត្រូវបន្តដំណើរទៅកាន់ប្រទេសម៉ាឡេស៊ី និងថៃ ខណ:ពេលដែលសហរដ្ឋអាមេរិក កំពុងព្យាយាមផ្សព្វផ្សាយពីអំបច្ចេកវិទ្យា AI ជំនាន់ថ្មីរបស់ខ្លួន។
ក្នុងអំឡុងពេលស្ថិតនៅរដ្ឋធានីរបស់ប្រទេសឥណ្ឌូណេស៊ី លោក Nadella បាននិយាយថា ក្រុមហ៊ុន Microsoft នឹងបន្តពង្រីកការវិនិយោគរបស់ខ្លួន នៅក្នុងការសាងសង់មជ្ឈមណ្ឌលទិន្នន័យ និងប្រព័ន្ធសេវាកម្ម Cloud នៅក្នុងប្រទេសឥណ្ឌូនេស៊ី ក្នុងចំនួនទឹកប្រាក់ប្រមាណ ១,៧ពាន់លានដុល្លារ ដើម្បីនាំយកហេដ្ឋារចនាសម្ព័ន្ធ AI ចុងក្រោយបំផុត និងអស្ចារ្យបំផុត មកកាន់ប្រទេសក្នុងតំបន់អាស៊ានមួយនេះ ។
ជម្រាបជូនទៀតផងដែរថា បើតាមរដ្ឋមន្ត្រីក្រសួងទំនាក់ទំនង លោក Budi Arie Setiadi បានប្រាប់អ្នកយកព័ត៌មានថា Nadella ក៏បានជួបជាមួយប្រធានាធិបតីដែលជិតផុតអាណត្តិ លោក ចូកូ វីដូដូ និងរដ្ឋមន្ត្រីខុទ្ទកាល័យរបស់គាត់ផងដែរ ដើម្បីពិភាក្សាអំពីការស្រាវជ្រាវរួមគ្នាលើបច្ចេកវិទ្យា AI និងការអភិវឌ្ឍជំនាញផ្សេងៗទៀត៕
