គណ:រដ្ឋមន្ត្រីថៃ កាលពីថ្ងៃទី៧ ខែឧសភាកន្លងទៅ បានយល់ព្រមអនុម័តទៅលើផែនការក្នុងការពង្រីកការលើកលែងទិដ្ឋាការសម្រាប់ភ្ញៀវទេសចរមកពីប្រទេសឥណ្ឌា និងតៃវ៉ាន់ រយ:ពេល ៦ខែបន្ថែមទៀត ក្នុងគោលបំណងទាក់ទាញចំនួនភ្ញៀវទេសចរមកពីទីផ្សារធំៗទាំងពីរនេះ។ នេះបើតាមការចុះផ្សាយពីសារព័ត៌មាន VNA។
នាយករដ្ឋមន្រ្តីថៃ លោក Srettha Thavisin បាននិយាយថា ភ្ញៀវទេសចរមកពីទីផ្សារទាំងពីរ នឹងអាចធ្វើដំណើរចូលមកកាន់ប្រទេសថៃដោយគ្មានទិដ្ឋាការរហូតដល់ថ្ងៃទី១១ ខែវិច្ឆិកា ឆ្នាំ២០២៤ បន្ទាប់ពីការលើកលែងដែលមានស្រាប់ ត្រូវបានបញ្ចប់នៅត្រឹមថ្ងៃទី៤ ខែឧសភាកន្លងទៅ។
គួរឲ្យដឹងផងដែរថា ជុំវិញផែនការថ្មីនេះ មានន័យថា ភ្ញៀវទេសចរឥណ្ឌា និងតៃវ៉ាន់ អាចមានសិទ្ធិស្នាក់នៅក្នុងប្រទេសថៃ ជាអតិបរមា ៣០ថ្ងៃ ក្នុងការធ្វើដំណើរមកមួយលើក ។
ជម្រាបជូនទៀតថា ប្រទេសថៃបាននឹងកំពុងបន្ធូរបន្ថយច្បាប់លើកលែងទិដ្ឋាការ សម្រាប់អ្នកធ្វើដំណើរមកពីទីផ្សារសំខាន់មួយចំនួនរបស់ខ្លួន រួមមានប្រទេសចិន និងរុស្ស៊ីផងដែរ ខណ:ពេលដែលក្រសួងទេសចរណ៍ និងកីឡាថៃ បានរាយការណ៍ថា ប្រទេសរបស់ខ្លួន បានស្វាគមន៍ភ្ញៀវទេសចរបរទេសសរុបជាង ១២ លាននាក់ ក្នុងរយៈពេល ៤ខែដំបូងនៃឆ្នាំនេះ ពោលគឺបានកើនឡើង ៣៩% បើធៀបនឹងពេលដូចគ្នាកាលពីឆ្នាំមុន៕
