ក្រុមហ៊ុនចិន Xiaomi បានក្លាយជាអ្នកផលិតរថយន្តអគ្គិសនីធំបំផុតទី០៨ នៅក្នុងប្រទេសចិន បន្ទាប់ពីទទួលបានជោគជ័យធំធេង ក្នុងការបញ្ចេញលក់រថយន្តម៉ូដែល SU7 បានច្រើនជាង ៧០០០គ្រឿង។ នេះបើតាមការចុះផ្សាយពីសារព័ត៌មាន Reuters។
បន្ទាប់ពីទទួលបានជោគជ័យធំនៅទីផ្សារក្នុងស្រុក Xiaomi កំពុងពិចារណាបោះជំហានចូលក្នុងទីផ្សារអន្តរជាតិម្ដង ដែលជាកន្លែងប្រមូលផ្ដុំគូប្រជែងខ្លាំងៗ ដូចជា BYD និង Tesla ជាដើម។
គួររំលឹកដែរថា Xiaomi ទើបប្រឡូកចូលក្នុងវិស័យរថយន្តអគ្គិសនីថ្មីថ្មោងប៉ុណ្ណោះ ដោយរថយន្តដំបូងរបស់ពួកគេ គឺមានឈ្មោះថា SU7 ដែលបញ្ចេញលក់កាលពីចុងខែមីនា ហើយគិតត្រឹមខែមេសា ពួកគេលក់បាន ៧ ០៥៨គ្រឿង ជាមួយផែនការលក់ឲ្យបាន ១០ម៉ឺនគ្រឿងនៅក្នុងឆ្នាំនេះ។
ជម្រាបបន្ថែមថា ក្រុមហ៊ុន Xiaomi ក៏បានបង្ហើបទៀតថា រយៈពេល ៧ខែទៀត ក្រុមហ៊ុនអាចនឹងនាំចេញរថយន្តអគ្គិសនីបានប្រហែលជាង ១ម៉ឺនគ្រឿងក្នុងមួយខែ ខណៈបច្ចុប្បន្នរថយន្តម៉ូដែល SU7 កំពុងទទួលបានការគាំទ្រខ្លាំងនៅក្នុងប្រទេសចិន៕
