កាលពីថ្ងៃទី២៣ ខែឧសភា តុលាការធម្មនុញ្ញថៃបានទទួលយកពាក្យបណ្តឹងរបស់សមាជិកសភាចំនួន៤០រូប ដែលបានរួមគ្នាដាក់ញត្តិទាមទារទំលាក់លោកនាយករដ្ឋមន្ត្រី សេដ្ឋា ថាវីស៊ីន ចេញពីតំណែង ដ្បិតរូបលោកបានតែងតាំងមេធាវីធ្លាប់ជាប់ពន្ធនាគារម្នាក់ មកឡើងធ្វើជាគណៈរដ្ឋមន្ត្រី។ នេះបើតាមការចុះផ្សាយពីសារព័ត៌មាន CNA ។
តុលាការធម្មនុញ្ញថៃមិនទាន់សម្រេចព្យួរតំណែងនាយករដ្ឋមន្ត្រីនៅឡើយទេ បើទោះបីបានទទួលយកញត្តិរបស់សមាជិកសភាថៃទាំង ៤០រូបក្នុងការទំលាក់លោកនាយករដ្ឋមន្ត្រី សេដ្ឋា ថាវីស៊ីន ចេញពីតំណែង ពីបទបំពាននឹងក្រមសីលធម៌ ដែលបានចែងក្នុងរដ្ឋធម្មនុញ្ញ។ សំណុំរឿងនេះ គឺមានការជាប់ពាក់ព័ន្ធនឹងការតែងតាំងលោក Pichit Chueban ដែលធ្លាប់ជាប់ពន្ធនាគារ ពីបទសូកប៉ាន់ និងប្រមាថមើលងាយមកលើប្រព័ន្ធតុលាការ។
កន្លងមកលោក សេដ្ឋា ថាវីស៊ីន បានសម្រេចតែងតាំង លោក Pichit ឲ្យឡើងធ្វើជារដ្ឋមន្ត្រីទទួលបន្ទុកខុទ្ទកាល័យនាយករដ្ឋមន្ត្រី។ តែយ៉ាងណាក្រោយរឿងអាស្រូវបានផ្ទុះឡើង វាបានបង្ខំឲ្យលោក Pichit សម្រេចលាឈប់វិញភ្លាមៗ ដោយលើកហេតុផលថា កុំឲ្យនាំរឿងរ៉ាវវែងឆ្ងាយដល់លោក សេដ្ឋា ។
គួរបញ្ជាក់ដូច្នេះថា កាលពីក្នុងឆ្នាំ២០០៨ លោក Pichit Chueban ធ្លាប់ភ្លក់រសជាតិជាប់ពន្ធនាគាររយៈពេលប្រាំមួយខែ ក្រោយពីគេចាប់បានថា លោកសូកប៉ាន់ទៅកាន់មន្ត្រីតុលាការកំពូល តាមរយៈការហុចកញ្ចប់ម្ហូបអាហារ ដោយបន្លំដាក់សាច់ប្រាក់សុទ្ធចំនួន ២លានបាត (៥៥ ២១៨ដុល្លារអាមេរិក) នៅក្នុងនោះ៕
