ស្ថាបនិកក្រុមហ៊ុន Amazon មហាសេដ្ឋី Jeff Bezos គឺជាកំពូលមហាសេដ្ឋីមានបំផុតលើលោកទី២ បន្ទាប់ពីមហាសេដ្ឋីបារាំង Bernard Arnault ហើយលោកក៏ធ្លាប់ជាប់ឈ្មោះជាមហាសេដ្ឋីមានដាច់គេលើលោកផងដែរ កាលពីប៉ុន្មានឆ្នាំមុន។
មុនក្លាយជាកំពូលមហាសេដ្ឋីមានលុយរាប់រយពាន់លានដុល្លារ Jeff Bezos ធ្លាប់ជាបុគ្គលម្នាក់ ដែលមានការងារមិនច្បាស់លាស់ ជាពិសេសអំឡុងពេលលោកស្ថិតក្នុងវ័យ ២០ឆ្នាំ គឺមានការផ្លាស់ប្ដូរការងារមិនទៀងទាត់ឡើយ។ នេះបើតាមការចុះផ្សាយពីគេហទំព័រ Yahoo។
មូលហេតុដែលមហាសេដ្ឋីម្នាក់នេះ ធ្វើការងារមិនទៀងទាត់ គឺដោយសារលោកប្រកាន់ជំហរចង់ចេញប្រកបអាជីវកម្មខ្លួនឯង ក៏ប៉ុន្តែចេញរកស៊ីដំបូងៗ គឺបរាជ័យ ខាតចុងខាតដើម ដូច្នេះហើយចង់មិនចង់ លោកក៏ត្រូវតែបង្ខំចិត្តធ្វើការបណ្ដើរ សន្សំលុយបណ្ដើរ ដើម្បីអាចធ្វើជាដើមទុនចេញរកស៊ីបន្តទៀត។
លោក Jeff Bezos បានចាប់ផ្ដើមការងារនៅធនាគារ Banker’s Trust ជាអ្នកគ្រប់គ្រងផលិតផល ហើយធ្វើការបាន ២ឆ្នាំ លោកបានឡើងតំណែងជាអនុប្រធានក្រុមហ៊ុននៅវ័យត្រឹម ២៦ឆ្នាំ។
លុះដល់ទសវត្សឆ្នាំ១៩៩០ ពេលដែលអ៊ីនធឺណិតចាប់ផ្ដើមមានប្រជាប្រិយភាព លោក Bezos ក៏បានសម្លឹងឃើញឱកាស នៃការដាក់លក់ផលិតផលតាមប្រព័ន្ធអ៊ីនធឺណិត ដោយលោកបានចុចយកផលិតផលចំនួន ២០ មកដាក់លក់ ក៏ប៉ុន្តែមានតែសៀវភៅប៉ុណ្ណោះ ដែលលក់ដាច់ជាងគេ។
រហូតដល់ឆ្នាំ១៩៩៤ លោកបានសម្រេចបោះបង់ការងារ ប្រថុយចេញរកស៊ីខ្លួនឯងម្ដងទៀត ដោយលើកនេះ គឺបានបង្កើតនៅគេហទំព័រមួយឈ្មោះថា Amazon ដោយចាប់ផ្ដើមដំបូង ពីការលក់សៀវភៅ រហូតដល់លក់សឹងតែគ្រប់ផលិតផល និងបានក្លាយជាវេទិកាពាណិជ្ជកម្មអេឡិចត្រូនិកធំបំផុតលើលោកនាពេលបច្ចុប្បន្ន។
សូមជម្រាបបន្ថែមថា បច្ចុប្បន្ននេះ Jeff Bezos គឺមានទ្រព្យសម្បត្តិសរុបប្រហែល ១៩៩ពាន់លានដុល្លារ ខណៈប្រភពចំណូលធំបំផុតរបស់លោក គឺបានមកពីក្រុមហ៊ុន Amazon៕
