ក្រុមហ៊ុនមហាសេដ្ឋីវៀតណាម គ្រោងពន្យារពេលសាងសង់រោងចក្រតម្លៃ ៤ពាន់លានដុល្លារ

ក្រុមហ៊ុនរថយន្តអគ្គិសនី VinFast របស់មហាសេដ្ឋីវៀតណាម Pham Nhat Voung គឺកំពុងពិចារណា ពន្យារពេលសាងសង់រោងចក្រតម្លៃប្រមាណ ៤ពាន់លានដុល្លារ នៅរដ្ឋ North Carolina សហរដ្ឋអាមេរិក។

យោងតាមការចុះផ្សាយពីសារព័ត៌មាន CNA បានបង្ហាញថា ក្រុមហ៊ុន VinFast ធ្លាប់បានប្រកាសកាលពីឆ្នាំ២០២២ថា ពួកគេនឹងសាងសង់រោងចក្រផលិតរថយន្តអគ្គិសនី និងអាគុយរថយន្ត ក្នុងសហរដ្ឋអាមេរិក ដែលអាចមានសមត្ថភាពផលិតរថយន្តបានរហូតដល់ ១៥០ ០០០គ្រឿងក្នុងមួយឆ្នាំ។

ផែនការរបស់ក្រុមហ៊ុនមួយនេះ គឺមានគម្រោងបញ្ចប់ការសាងសង់នៅខែកក្កដា ឆ្នាំ២០២៤ ក៏ប៉ុន្តែវាក៏ត្រូវបានពន្យារពេលបើកដំណើរការដល់ឆ្នាំ២០២៥ ខណៈបច្ចុប្បន្ននេះ គឺកំពុងពិចារណាពន្យារពេលម្ដងទៀត។

ចំណែកឯមូលហេតុនៃការពន្យារពេលលើកនេះ គឺមិនត្រូវបានបង្ហើបឲ្យដឹងជាសាធារណៈនៅឡើយទេ ក៏ប៉ុន្តែមួយរយៈចុងក្រោយនេះ VinFast គឺមានបញ្ហាជាច្រើននៅសហរដ្ឋអាមេរិក តួយ៉ាងកំពុងជាប់បណ្ដឹងទាក់ទងនឹងបញ្ហាសុវត្ថិភាព ក៏ដូចជាមានបញ្ហារឿងបង់ថ្លៃជួលកន្លែងតាំងបង្ហាញរថយន្តជាដើម៕