ស្ថាប័ននិយតកម្មហិរញ្ញវត្ថុរបស់ទីក្រុងប៉េកាំង បាននិយាយកាលពីថ្ងៃសុក្រសប្តាហ៍មុនថា ក្រុមហ៊ុនអចលនទ្រព្យខ្នាតយក្សរបស់ចិន Evergrande នឹងត្រូវរងការផាកពិន័យជាទឹកប្រាក់ចំនួន ៤,១៨ពាន់លានយ៉ន់ (៥៧៧លានដុល្លារ) ពាក់ព័ន្ធទៅនឹងការអនុវត្តអាជីវកម្មក្លែងបន្លំ។ នេះបើតាមការចុះផ្សាយពីសារព័ត៌មាន CNA។
គណៈកម្មការនិយតកម្មមូលបត្រចិន ក៏បាននិយាយក្នុងសេចក្តីថ្លែងការណ៍មួយថា នៅរវាងឆ្នាំ២០១៩ ដល់ឆ្នាំ២០២០ ក្រុមហ៊ុន Evergrande Real Estate បានបង្កើនប្រាក់ចំណូល និងប្រាក់ចំណេញក្លែងក្លាយ ជាមួយនឹងការប្រកាសអំពីប្រាក់ចំណូលមុនកាលកំណត់ ដែលនេះបានបណ្តាលឲ្យមានការក្លែងបន្លំនៃការចេញមូលបត្របំណុល ដែលត្រូវស្នើឲ្យមានការបោះផ្សាយជាសាធារណៈ នៅលើទីផ្សារប្តូរប្រាក់។
ទន្ទឹមនឹងនេះ និយតកម្មមូលបត្រចិន ក៏បានធ្វើការពិន័យទៅលើស្ថាបនិករបស់ក្រុមហ៊ុន Evergrande លោក Hui Ka Yan នៅក្នុងចំនួនទឹកប្រាក់ ៤៧លានយ៉ន់ ផងដែរជុំវិញករណីក្លែងបន្លំនេះ ដោយថែមទាំងបានហាមឃាត់រូបលោកពីការចូលទៅក្នុងទីផ្សារមូលបត្រឡើងវិញ អស់មួយជីវិតផងដែរ។
គួរឲ្យដឹងផងដែរថា Evergrande គឺជាក្រុមហ៊ុនអភិវឌ្ឍអចលនទ្រព្យដែលជំពាក់បំណុលច្រើនជាងគេបំផុតនៅលើពិភពលោក ជាមួយនឹងបំណុលសរុបជាង ៣០០ពាន់លានដុល្លារ។ ហើយកាលពីដើមឆ្នាំនេះ ក្រុមហ៊ុនត្រូវបានបញ្ជាឲ្យរំលាយចោល ដោយតុលាការហុងកុង សម្រាប់ការមិនអាចផ្តល់ផែនការរៀបចំរចនាសម្ព័ន្ធបំណុលឡើងវិញ លើសពី ២ឆ្នាំ ក្រោយខកខានការទូទាត់សងបំណុលក្រៅប្រទេសជាបន្តបន្ទាប់៕
