ក្រុមហ៊ុនផលិតបន្ទះឈីប Nvidia បានក្លាយជាក្រុមហ៊ុនមានតម្លៃថ្លៃបំផុតលើលោកទី២ បន្ទាប់ពីទម្លាក់ក្រុមហ៊ុនលក់ទូរស័ព្ទ Apple កាលពីពេលថ្មីៗនេះ។ នេះបើតាមការចុះផ្សាយពីសារព័ត៌មាន Reuters។
គិតត្រឹមថ្ងៃទី០៥ ខែមិថុនា តម្លៃមូលធនទីផ្សាររបស់ក្រុមហ៊ុន Nvidia បានហក់ឡើងដល់ចំនួន ៣,០១២ទ្រីលានដុល្លារ ស្របពេលមូលធនទីផ្សាររបស់ក្រុមហ៊ុន Apple គឺនៅត្រឹម ៣,០០៣ទ្រីលានដុល្លារ។
មូលហេតុដែលធ្វើឲ្យតម្លៃក្រុមហ៊ុន Nvidia ហក់ឡើងខ្ពស់ដូច្នេះ ព្រោះតែបច្ចុប្បន្នតម្រូវការបន្ទះឈីប គឺកំពុងមានសន្ទុះខ្លាំង ដែលធ្វើឲ្យក្រុមហ៊ុនមួយនេះទទួលផលចំណេញបានច្រើនក្រាស់ក្រែល ពោលរយៈពេល ៦ខែនេះ តម្លៃភាគហ៊ុនរបស់ Nvidia មានកំណើនដល់ ១៤៧% និងមានតម្លៃរហូតដល់ ១ ២២៤ដុល្លារក្នុងមួយហ៊ុន។
សូមជម្រាបដែរថា បច្ចុប្បន្ន Apple និង Nvidia កំពុងប្រជែងគ្នា ក្នុងការដណ្ដើមតំណែងជាក្រុមហ៊ុនមានតម្លៃថ្លៃបំផុតលើលោកទី២ ខណៈក្រុមហ៊ុន Microsoft នៅតែបន្តគ្រងម្កុដ ជាក្រុមហ៊ុនមានតម្លៃថ្លៃបំផុតលើលោក ជាមួយមូលធនទីផ្សារ ៣,១៥ទ្រីលានដុល្លារ៕
