អាជ្ញាធរនៅក្នុងប្រទេសឥណ្ឌា និងរុស្ស៊ី បានបង្ហាញពីក្តីសង្ឃឹមក្នុងការមើលឃើញឥណ្ឌូណេស៊ីដែលជាប្រទេសមានសេដ្ឋកិច្ចធំបំផុតក្នុងតំបន់អាស៊ីអាគ្នេយ៍ ចូលរួមជាមួយក្រុម BRICS នៅថ្ងៃណាមួយ ដើម្បីផ្តល់ឲ្យប្លុកនេះ កាន់តែមានឈ្មោះបោះសម្លេងនៅលើពិភពលោក។
ឯកអគ្គរដ្ឋទូតឥណ្ឌូណេស៊ីប្រចាំប្រទេសឥណ្ឌា លោកស្រី Ina Krisnamurthi បានប្រាប់ទៅកាន់កាសែត The Jakarta Post កាលពីថ្ងៃពុធសប្តាហ៍នេះថា ប្រទេសឥណ្ឌូណេស៊ី បានបង្ហាញពីការដឹកនាំរបស់ខ្លួន តាមរយៈតួនាទីសំខាន់ៗដូចជាប្រធានក្រុមប្រទេស G20 សម្រាប់ឆ្នាំ២០២២ ជាប្រធានអាស៊ានសម្រាប់ឆ្នាំ២០២៣ និងធ្វើជាម្ចាស់ផ្ទះនៃវេទិកាទឹកពិភពលោកនាពេលថ្មីៗនេះ ផងដែរ។
លោកស្រី Ina ក៏បាននិយាយបន្ថែមទៀតថា ៖ “ឥណ្ឌាមានក្តីសង្ឃឹមខ្ពស់ថា ឥណ្ឌូណេស៊ីអាចចូលរួមជាមួយក្រុមប្រទេស BRICS បាន ពីព្រោះឥណ្ឌាមើលឃើញថាឥណ្ឌូណេស៊ី ជាមហាអំណាចដ៏ធំមួយ នៅក្នុងតំបន់ឥណ្ឌូប៉ាស៊ីហ្វិក”។
ស្រដៀងគ្នានេះដែរ ឯកអគ្គរដ្ឋទូតឥណ្ឌូណេស៊ីប្រចាំនៅប្រទេសរុស្ស៊ី លោក Jose Tavares ក៏បាននិយាយអំពីអត្ថប្រយោជន៍ដ៏មានសក្តានុពលនៃសមាជិកភាពរបស់ឥណ្ឌូណេស៊ី នៅក្នុងប្លុកនេះផងដែរ។
ប៉ុន្តែទោះជាយ៉ាងណាក៏ដោយ ទាំងលោកស្រី Ina និងលោក Jose បានកត់សម្គាល់ផងដែរថា បច្ចុប្បន្នមិនទាន់មានការជំរុញជាផ្លូវការណាមួយពីសំណាក់រដ្ឋាភិបាលឥណ្ឌូណេស៊ី ដើម្បីពិនិត្យមើលឡើងវិញនូវលទ្ធភាពក្នុងការចូលរួមជាមួយក្រុម BRICS នេះ នៅឡើយនោះទេ។
ជម្រាបជូនផងដែរថា BRICS ដែលសំដៅទៅលើប្រទេសប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង បានសន្យាថានឹងប្តេជ្ញាគាំទ្រដល់ប្រទេសកំពុងអភិវឌ្ឍ ក៏ដូចជានាំយកសមាជិកថ្មីពីប្រទេសដែលមានសេដ្ឋកិច្ចកំពុងរីកចម្រើនផ្សេងទៀត នៅលើពិភពលោក៕
