ក្រុមហ៊ុនមេរបស់ TikTok គឺក្រុមហ៊ុន ByteDance មានបំណងចង់ចាយលុយប្រមាណ ១០ពាន់លានរីងហ្គីត ឬប្រហែល ២,១៣ពាន់លានដុល្លារ ដើម្បីសាងសង់មជ្ឈមណ្ឌលបច្ចេកវិទ្យាបញ្ញាសិប្បនិមិត្ត (AI) នៅប្រទេសម៉ាឡេស៊ី។ នេះបើតាមការចុះផ្សាយពីសារព័ត៌មាន Reuters។
រដ្ឋមន្ត្រីក្រសួងពាណិជ្ជកម្មម៉ាឡេស៊ី លោក Tengku Zafrul Azis ក៏បានបង្ហាញចំណាប់អារម្មណ៍រីករាយ និងបាននិយាយថា ការវិនិយោគរបស់ក្រុមហ៊ុន ByteDance នឹងជួយឲ្យម៉ាឡេស៊ី ខិតកាន់តែកៀកជាមួយនឹងគោលបំណង សម្រេចឲ្យបាននូវកំណើនសេដ្ឋកិច្ចឌីជីថល ២២,៦% នៃ GDP សរុប ត្រឹមឆ្នាំ២០២៥ ខាងមុខ។
សូមជម្រាបដែរថា មួយរយៈចុងក្រោយនេះ ម៉ាឡេស៊ីហាក់កំពុងអូសទាញក្រុមហ៊ុនបច្ចេកវិទ្យាខ្នាតយក្សទូទាំងសកលលោក មកបណ្ដាក់ទុននៅក្នុងប្រទេសរបស់ខ្លួន តួយ៉ាងកាលពីខែមុន Google ទើបប្រកាសចាក់លុយវិនិយោគ ២ពាន់លានដុល្លារ ស្របពេល Microsoft ក៏ប្រកាសបណ្ដាក់ទុន ២,២ពាន់លានដុល្លារនៅម៉ាឡេស៊ីថែមទៀត៕
