ក្រុមហ៊ុនបុត្រសម្ព័ន្ធមួយរបស់មហាសេដ្ឋីមានបំផុតនៅក្នុងតំបន់អាស៊ី លោក Mukesh Ambani ថ្មីៗនេះ បានយកឈ្នះការប្រកួតប្រជែងជាមួយក្រុមហ៊ុន Starlink របស់មហាសេដ្ឋីពិភពលោក Elon Musk ដើម្បីទទួលបានការយល់ព្រមពីនិយតករអវកាសរបស់ប្រទេសឥណ្ឌា ក្នុងការបាញ់បង្ហោះផ្កាយរណបរបស់ខ្លួន ដើម្បីផ្តល់សេវាកម្មអ៊ីនធឺណិត នៅក្នុងប្រទេស។ នេះបើតាមការចុះផ្សាយពីសារព័ត៌មាន Asia Financial។
ក្រុមហ៊ុន Jio Platforms ដែលជាបុត្រសម្ព័ន្ធរបស់ក្រុមហ៊ុនមេ Reliance Industries ដឹកនាំដោយមហាសេដ្ឋីអាស៊ី Mukesh Ambani និងក្រុមហ៊ុន SES របស់ប្រទេសលុចសំបួ បានទទួលការយល់ព្រមពីរដ្ឋាភិបាលឥណ្ឌា សម្រាប់គោលបំណងផ្តល់សេវាកម្មអ៊ីនធឺណិតល្បឿនលឿនតាមរយៈផ្កាយរណប ជាពិសេសនៅតាមតំបន់ដាច់ស្រយាល ទូទាំងប្រទេស។
យោងតាមមន្ត្រីរដ្ឋាភិបាល បានបង្ហាញឲ្យដឹងទៀតថា មជ្ឈមណ្ឌលផ្សព្វផ្សាយ និងអនុញ្ញាតអវកាសជាតិឥណ្ឌា ហៅកាត់ IN-SPACe បានយល់ព្រមទៅលើកិច្ចព្រមព្រៀងចំនួនបី សម្រាប់ក្រុមហ៊ុនរបស់លោក Ambani នៅអំឡុងខែមេសា និងមិថុនា ដើម្បីអនុញ្ញាតឲ្យដាក់ទីតាំងផ្កាយរណប នៅពីលើប្រទេសឥណ្ឌា។
គួរឲ្យដឹងថា ក្រៅតែពីក្រុមហ៊ុន Reliance មានក្រុមហ៊ុនសកលជាច្រើនទៀត ដូចជា Kuiper របស់ Amazon និង Starlink របស់មហាសេដ្ឋី Elon Musk ក៏កំពុងប្រកួតប្រជែងគ្នា ដើម្បីទទួលបានការយល់ព្រមពីរដ្ឋាភិបាល ក្នុងការបើកដំណើរការសេវាកម្មអ៊ីនធឺណិតតាមរយ:ផ្កាយរណបរបស់ខ្លួន នៅក្នុងប្រទេសឥណ្ឌា ផងដែរ។
ជម្រាបផងដែរថា យោងតាមក្រុមហ៊ុន Deloitte បានព្យាករថាទីផ្សារផ្តល់សេវាអ៊ីនធឺណិតតាមផ្កាយរណបរបស់ប្រទេសឥណ្ឌា អាចនឹងកើនឡើង ៣៦% ក្នុងរយៈពេល ៥ឆ្នាំខាងមុខ ហើយអាចឈានដល់តម្លៃ ១,៩ពាន់លានដុល្លារ នៅឆ្នាំ២០៣០៕
