នាយករដ្ឋមន្ត្រីវៀតណាម គ្រោងជួលជនបរទេសមកគ្រប់គ្រងក្រុមហ៊ុនរបស់រដ្ឋ

នាយករដ្ឋវៀតណាម លោក Pham Minh Chinh បានអំពាវនាវឲ្យក្រុមហ៊ុនរបស់រដ្ឋទាំងអស់ ពិចារណាលើការជួលជនបរទេស ដែលមានសមត្ថភាព ដើម្បីមកគ្រប់គ្រងក្រុមហ៊ុន និងបង្កើនការអភិវឌ្ឍធនធានមនុស្សបន្ថែមទៀត។

យោងតាមការចុះផ្សាយពីសារព័ត៌មាន VNExpress បានបង្ហាញថា អំឡុងពេលជួបប្រជុំជាមួយប្រធានក្រុមហ៊ុនរបស់រដ្ឋ ចំនួន ១៥០រូប មេដឹកនាំវៀតណាមបាននិយាយថា ការអភិវឌ្ឍធនធានមនុស្ស គឺជាកូនសោសំខាន់បំផុត ក្នុងគម្រោងការអភិវឌ្ឍនៃប្រទេសវៀតណាម។

ទន្ទឹមនឹងនោះ លោក Pham Minh Chinh ក៏បានជំរុញឱ្យសហគ្រាសរដ្ឋ កែសម្រួលប្រាក់បៀវត្សរ៍ និងគោលនយោបាយប្រាក់បៀវត្សរ៍ ដើម្បីទាក់ទាញធនធានមនុស្សប្រកបដោយគុណភាពខ្ពស់ ខណៈដែលអាជីវកម្មភាគច្រើនដែលគ្រប់គ្រងក្នុងស្រុកបង្ហាញពីសមត្ថភាពមានកម្រិត និងប្រសិទ្ធភាពអាជីវកម្មទាប។

សូមជម្រាបដែរថា សហគ្រាសរដ្ឋ គឺបានជួយដល់ការអភិវឌ្ឍនៃប្រទេសវៀតណាមជាខ្លាំង ពោលកាលពីឆ្នាំទៅ ប្រាក់ចំណូលបានមកពីសហគ្រាសរដ្ឋទាំងអស់ គឺសម្រេចបានរហូតដល់ ៦៧ពាន់លានដុល្លារឯណោះ៕