នៅក្នុងរយ:ពេលត្រឹម ៦ខែដំបូងនៃឆ្នាំ២០២៤ នេះ ការនាំចេញបន្លែ និងផ្លែឈើរបស់ប្រទេសវៀតណាម អាចរកចំណូលបាន ៣,៤ពាន់លានដុល្លារ ពោលគឺកើនឡើងដល់ ២៨% បើធៀបទៅនឹងរយ:ពេលដូចគ្នាកាលពីឆ្នាំមុន ដោយសារតែតម្រូវការមានកើនឡើង នៅក្នុងទីផ្សារសំខាន់ៗមួយចំនួន។ នេះបើតាមការចុះផ្សាយពីសារព័ត៌មាន VNA។
សមាគមន៍បន្លែ និងផ្លែឈើវៀតណាម បានបង្ហាញឲ្យដឹងថា ទីផ្សារធំៗដូចជាប្រទេសចិន ថៃ និងកូរ៉េខាងត្បូង បានបង្កើនការនាំចូលពីប្រទេសវៀតណាម ចន្លោះពី ៣០% ទៅ ៦០% ខណ:ទីផ្សារសំខាន់ៗមួយចំនួនផ្សេងទៀត បានបង្កើនការនាំចូល ពី ១០% ទៅ ៥០%។
គួរឲ្យដឹងផងដែរថា ចំពោះប្រទេសចិនដែលជាទីផ្សារធំជាងគេបំផុត បានចំណាយទឹកប្រាក់ដល់ទៅ ១,៧ពាន់លានដុល្លារ ចំពោះការនាំចូលបន្លែ និងផ្លែឈើរបស់វៀតណាម ក្នុងរយ:ពេល ៥ខែដំបូងឆ្នាំនេះ។
លោក Dang Phuc Nguyen អគ្គលេខាធិកាសមាគមបានមានប្រសាសន៍ថា វៀតណាម មានលក្ខណ:សម្បត្តិជាច្រើនជុំវិញការនាំចេញទៅកាន់ប្រទេសចិន ដោយសារទីតាំងភូមិសាស្ត្រនៅជិតគ្នា និងភាពស្រដៀងគ្នានៃម្ហូប អាហារ។ លោកបានបន្តទៀតថា ប្រទេសចិននឹងចុះហត្ថលេខាលើពិធីសារដែលអនុញ្ញាតឲ្យវៀតណាម អាចនាំចេញទុរេនក្លាសេ និងផលិតផលកសិកម្មមួយចំនួនទៀតដូចជារុក្ខជាតិឱសថ ដូង និងផ្លែឈើកក។
លោក Dang ក៏បានសង្កត់ធ្ងន់ទៀតផងដែរថា ប្រសិនបើក្រុមហ៊ុនអាជីវកម្មក្នុងស្រុក អាចទាញយកផលចំណេញបានពីកិច្ចព្រមព្រៀងខាងលើនេះ នោះការនាំចេញបន្លែ និងផ្លែឈើអាចនឹងកើនឡើង ១៥%ទៅ២០% នៅឆមាសទីពីរ ហើយអាចរកចំណូលបានច្រើនជាង ៧ពាន់លានដុល្លារសម្រាប់ឆ្នាំនេះ៕
