ការនាំចេញទំនិញរបស់កូរ៉េខាងត្បូងបានបន្តកើនឡើងនៅក្នុងខែមិថុនា ខណៈដែលវាជាការកើនឡើងរយៈពេលប្រាំបួនខែជាប់ៗគ្នាមកហើយ។ ការកើនឡើងនៃការនាំចេញនៅក្នុងសេដ្ឋកិច្ចធំបំផុតទីបួនរបស់អាស៊ីមួយនេះ ក៏ដោយសារតែមានតម្រូវការយ៉ាងក្លាំងក្លាពីទីផ្សារពិភពលោកចំពោះផលិតផលបន្ទះឈីប និងរថយន្តជាដើម។
![](https://www.oknha.news/wp-content/uploads/2024/07/image-20.png)
សារព័ត៌មាន Reuters បានដកស្រង់ទិន្នន័យបឋមរបស់សេវាគយកូរ៉េ ដែលបានបង្ហាញឲ្យដឹងថា នៅខែមិថុនា ការលក់នៅក្រៅប្រទេសបានកើនឡើងដល់ទៅចំនួន ៥៧,០៧ពាន់លានដុល្លារ ឬស្មើរនឹង៥,១% បើធៀបទៅនឹងឆ្នាំមុន រីឯការនាំចូលនៅខែមិថុនាដូចគ្នាវិញ បានថយចុះដល់ទៅ៧,៥% មកនៅត្រឹម ៤៩,០៧ពាន់លានដុល្លារប៉ុណ្ណោះ។
បន្ទះឈីបដែលជាផលិតផលដ៏មានតម្រូវការបំផុតរបស់ពិភពលោកនាពេលសព្វថ្ងៃ កូរ៉េខាងត្បូងបានកើនឡើងនៃការនាំចេញដល់ទៅចំនួន៥២,២% ឯណោះបើធៀបទៅនឹងឆ្នាំមុន ស្របពេលដែលការនាំចេញរថយន្តក៏មានការកើនឡើងដូចគ្នាពោលមានចំនួន៣,៨% ផងដែរ។
គួរបញ្ជាក់ដែរថា នៅអំឡុងខែមិថុនា ចំណោមគោលដៅនាំចេញទំនិញសំខាន់ៗចំនួនប្រាំបួនរបស់កូរ៉េខាងត្បូង ក្នុងនោះមានប្រាំមួយទៅហើយដែលការនាំចេញមានការកើនឡើង តួយ៉ាងទំនិញទៅកាន់សហរដ្ឋអាមេរិកកើនឡើង១៦,៨% ខណៈឯទំនិញនាំចេញទៅចិនកើនឡើង៥,៤% ពីមួយឆ្នាំទៅមួយឆ្នាំ៕