ដោយផ្អែកតាមកិច្ចខិតខំប្រឹងប្រែងជំរុញហេដ្ឋារចនាសម្ព័ន្ធ ប្រទេសចិនកំពុងតែបង្ហាញនូវគម្រោងព្រែកជីកថ្មីមួយទៀត ដើម្បីប្រកួតប្រជែងជាមួយប្រឡាយព្រែកជីក Suez របស់អេហ្ស៊ីប។ គម្រោងដ៏មានសារៈសំខាន់សម្រាប់វិស័យដឹកជញ្ជូននេះ មានឈ្មោះថា Pinglu លាតសន្ធឹងប្រវែង ១៣៤គីឡូម៉ែត្រ ពីអាងស្តុកទឹក Xijin ជិតរដ្ឋធានី Nanning របស់ទីក្រុង Guangxi ទៅកាន់កំពង់ផែ Qinzhou ភាគខាងត្បូងប្រទេស។
![](https://www.oknha.news/wp-content/uploads/2024/07/image-269.png)
សារព័ត៌មាន Express បានចុះផ្សាយថា ភក់ និងថ្ម ដែលកប់ក្នុងបាតទន្លេ នឹងត្រូវបានគេស្តារយកចេញដល់ទៅចំនួន ៣៤០លានម៉ែត្រគូប ខណៈការចំណាយលើការជីកប្រឡាយ Pinglu ព្រមទាំងការចំណាយលើការពង្រីក ឬសាងសង់ផ្លូវហាយវេ និងផ្លូវដែកសម្រាប់ដឹកជញ្ជូនទំនិញមកកាន់កប៉ាល់ ឲ្យកាន់តែងាយស្រួលជាងមុននោះ នឹងត្រូវចំណាយទំហំទុនវិនិយោគអស់ខ្ទង់ចំនួន ៧២,៧ពាន់លានយ័ន (ជាង ១០ពាន់លានដុល្លារ) ផងដែរ។
![](https://www.oknha.news/wp-content/uploads/2024/07/image-275.png)
គួរឲ្យដឹងថា ប្រឡាយ Pinglu ត្រូវបានចាប់ផ្តើមគម្រោងតាំងតែពីឆ្នាំ២០១៩ មកម្លេះ ហើយប្រសិនបើដំណើរការរលូនទៅតាមផែនការ វាអាចនឹងត្រូវបានបញ្ចប់គម្រោងជាស្ថាពរនាឆ្នាំ២០២៦ ខាងមុខ ។ ម្យ៉ាងវិញទៀត ផ្លូវទឹកថ្មីរបស់ចិន Pinglu ត្រូវបានគេរំពឹងទៀតថា នឹងកាត់បន្ថយចម្ងាយដឹកជញ្ជូនពីប្រព័ន្ធទន្លេ ទៅកាន់សមុទ្របានរហូតដល់ទៅ ៥៦០គីឡូម៉ែត្រឯណោះ បើធៀបនឹងការធ្វើដំណើរឆ្លងកាត់តាមខេត្ត Guangzhou ។
សូមជម្រាបជូនថា នៅប្រទេសចិន គម្រោងសាងសង់ និងហេដ្ឋារចនាសម្ព័ន្ធធំៗដូច្នេះ សឹងតែមិនមែនជារឿងចម្លែកទៅហើយ ដោយថាប្រទេសជាមហាអំណាចសេដ្ឋកិច្ចធំលំដាប់ទីពីររបស់ពិភពលោកមួយនេះ តែងតែបន្តស្វែងរកមធ្យោបាយ ជំរុញសកម្មភាពសេដ្ឋកិច្ច និងធ្វើឲ្យផលិតផលក្នុងស្រុកសរុបកើនឡើងជាលំដាប់៕
![](https://www.oknha.news/wp-content/uploads/2024/07/image-270-1024x576.png)